پەیامی وەزیری کاروباری پێشمەرگە بە بۆنەی ڕۆژی ئاڵای کوردستانەوە

لە ڕۆژی ئاڵای کوردستاندا، شۆڕش ئیسماعیل، وەزیری کاروباری پێشمەرگە، پەیامێکی بڵاوکردەوە کە ئەمەی خوارەوە دەقەکەیەتی؛
ئاڵای کوردستان شوناس و ناسنامە و هێمای نەتەوەییمانە. ٧٨ ساڵ بەر لـە ئێستا بۆ یەکەمینجار لەژێر سایە و حوکمڕانی کۆماری کوردستان لە کاتی ڕێوڕەسمی ڕاگەیاندنی دامەزراندنی کۆماری کوردستان لە گۆڕەپانی چوارچرای شاری مەهاباد، ئاڵای کوردستان لەلایەن ڕابەری کۆماری کوردستان، نەمر قازی محەمەد و هاوڕێکانی بەرز ڕاگیرا و بۆ یەکەمینجار لە ئاسمانی کوردستاندا شەکایەوە، لەو ڕۆژەوە ئاڵای کوردستان زیندووە و قەت نانەوێ.
پێشمەرگە قوربانیی زۆری لەپێناو بەرزڕاگرتنی ئاڵای کوردستان و پارێزگاریکردن لە خەڵک و خاکی کوردستان بەرانبەر دووژمنانی نیشتمانەکەمان بەخشیوە، گیانفیدایی و داستانی قارەمانییەتیی هێزی پێشمەرگە لە ڕابردوو و ئێستاشدا هەرگیز لەیاد ناکرێت.
لە ئاییندەشدا پێشمەرگە و خەڵکی کوردستان پێکەوە پارێزەری ئاڵا و خاکی کوردستان دەبن، لەپێناو بەهێزبوونی قەوارەی کوردستان و سەربەخۆی خاک و گەلەکەمان.
دروود بۆ ڕۆحی پاکی سەرجەم شەهیدانی کوردستان،
شەکاوەبێت هەردەم ئاڵای کوردستان

شۆڕش ئیسماعیل
وەزیری پێشمەرگەی حکومەتی هەرێمی کوردستان
١٧ـی کانوونی یەکەمی ٢٠٢٤