سەرۆکی ئەرکان بۆ جەژنە پیرۆزە سەردانی سەنگەرەکانی پێشمەرگەى كرد
ڕۆژى يه‌كشه‌ممه ١٦ی حوزه‌یرانی ٢٠٢٤، کە هاوکاتە لەگەڵ یەکەم ڕۆژی جەژنی قوربانی پیرۆز، فەریق روکن عیسا عوزێر، سەرۆک ئەرکانی وەزارەتی پێشمەرگە، بە یاوەری ڕاوێژکاری وەزارەت و جێگری سەرۆکی ئەرکان بۆ ئۆپراسیۆنەکان و ژمارەیەک لە ئەفسەرانی باڵای وەزارەت، بە مەبەستی جەژنە پیرۆزە، سەردانی بارەگا و سەنگەرەکانی لیوای دوو، شه‌ش و شازده‌ى پیادە و فەوجێکی لیوای ٢٣ی پیادەی کرد و لەلایەن فەرماندە و ئەفسەرانی لیواکانی پیادە پێشوازییان لێ کرا.
لەم سەردانەدا، سەنگەر و بارەگاکانی هێزی پێشمەرگەیان بەسەر کردەوە و پیرۆزبایيی جەژنی قوربانیان لە فەرماندە و تەواوی ئەفسەر و پێشمەرگەکان کرد و هیوای ئەوەیان خواست کە ئەم جەژنەیان بە ئاسوودەیی کردبێت و لە هەمان کاتیشدا گفتوگۆیان له‌بارەی پێداویستیيە ئیدارییەکانی هێزی پێشمەرگە لە سنووری ئەرک و پەرپرسیاریيەتی لیواکان کرد و بەڵێن درا کار لەسەر تەواوی ئەو پێداویستیيانە بکرێت کە بۆ باشتر بەڕێوەچوونی کارەکانی هێزی پێشمەرگە پێویستن.
سەرۆکی ئەرکان دوای بینینی بارودۆخی لیواکان لە پێداویستی و داخوازی لیواکانی کۆڵیەوە و بەڵێنی دا بەشێک لە پێداویستیيەکانی هەر سێ لیواکە، لە ماوەیەکی نزیکدا چارەسەر بکات، لەلایەن خۆشیانەوە فەرماندە و ئەفسەر و پێشمەرگەکان، کە لە سەنگەری بەرگرین لە خاک و نیشتمان، دڵخۆشيی خۆیان بە سەردانەکەی سەرۆکی ئەرکان و تیمی یاوەری دەربڕی.
