لە ڕێوڕەسمێکدا بەڕێوەبەری وەرزش و یارییەکان ئاڵوگۆڕ کرا
![](/media/26788/img_4574.jpeg?crop=0,0.0033464052287581697,0.0000000000000001263187085796,0.20606535947712418&cropmode=percentage&width=1200&height=630&rnd=133606603410000000)
لە چوارچێوەی ئەو گۆڕانکارییە کارگێڕییانەی کە لەناو دیوان و یەکەکانی وەزارەتی پێشمەرگە دەکرێن، ڕۆژی یەکشەممە ١٩ی ئایاری ٢٠٢٤، لە بەڕێوەبەرایەتیی وەرزش و یارییەکان، بە ئامادەبوونی لیوا دڵشاد سەعید، بەڕێوەبەری ئیدارەی گشتی و لیوا حەسەن شێخ مەلا، بەڕێوەبەری مەشقی سەربازی و ژمارەیەک لە ئەفسەرانی باڵای وەزارەتی پێشمەرگە، لە ڕێوڕەسمێکدا ئاڵوگۆڕی پۆستی بەڕێوەبەری وەرزش و یارییەکان بەڕێوەچوو.
لەو ڕێوڕەسمەدا عمید نیزام عەلی، لە شوێنی لیوا ئەحمەد غازی، وەک بەڕێوەبەری وەرزش و یارییەکان دەست بەکار بوو.
لەم بارەیەوە بەڕێوەبەری ئیدارەی گشتی، سوپاس و پێزانینی وەزارەتی پێشمەرگەی ئاراستەی لیوا ئەحمەد غازی کرد، کە لە ماوەی ڕابردوودا، خەمخۆرانە هەوڵی بۆ سەرخستن و ڕاییکردنی کارەکانی بەڕێوەبەرایەتییەکە داوە و هیوای سەرکەوتنیشی بۆ خواست، هاوکات پیرۆزبایی لە عمید نیزام عەلی کرد و هیوای خواست لە ئەرکی نوێیدا سەرکەوتوو بێت.
شایانی باسە، ئەم ئاڵوگۆڕییانە لە چوارچێوەی زنجیرەیەک گۆڕانکاریدایە، لەناو دیوان و یەکەکانی وەزارەتی پێشمەرگە، لەپێناو بەرەوپێشبردنی کار و ئەرکەکانی وەزارەت و هاوتەریبە لەگەڵ پرۆسەی چاکسازی لە وەزارەتی پێشمەرگەدا.