بەڕێوه‌بەری چاکسازيی وه‌زاره‌تى كاروبارى پێشمه‌رگه لەگەڵ شاندێکی هاوپەیمانان کۆبووەوە
ڕۆژى سێشه‌ممه ۲٦ی تشرینی دووەمی ۲٠۲٤، لیوای ئەندازیار نەبەز صلاح صدیق، بەڕێوەبەری چاکسازيی وەزارەتی كاروبارى پێشمەرگە، پێشوازی لە نوێنەری هێزەکانی هۆڵەندا و ئەستۆنیا لە نێو فەرماندەیيی هێزەکانی هاوپەیمانیی نێودەوڵەتی لە هەرێمی کوردستان کرد.
لە کۆبونەوەكه‌دا، گفتوگۆ لەبارەی دوایین هەنگاوەکانی وەزارەتی پێشمەرگە، بۆ دامەزراندنی فەرماندەیيی دەڤەرەکان و ڕێکارەکانی پەیوەست بە ڕێکخستنی هێزەکانی حه‌فتا و هه‌شتا، لە چوارچێوەی ئەو فەرماندەییانەدا کرا.
هەر لە کۆبوونەوەکەدا، بەڕێوەبەری چاکسازی دوایین بەرەوپێشچوونەکانی پرۆسەی چاکسازى خستەڕوو. لەمبارەیەوە تاووتوێی بارودۆخی پرۆژەکانی چاکسازی و چۆنیيەتی پاڵپشتیکردنی پرۆسەکە لەلایەن هێزەکانی هاوپەیمانانەوە کرا، پاشان هەردوولا دووپاتیان لە پێویستيی ڕۆڵ و هاوکاريی هێزەکانی هاوپەیمانان لە بواری ڕاوێژکاریدا كرده‌وه، بە مەبەستی سەرخستنی پرۆسەکە و بەردەوامیدان بە هەماهەنگی و بەدواداچوون بۆ پرۆژەکانی چاکسازی.
