سەرۆکی ئەرکانی وەزارەتی کاروباری پێشمەرگە پێشوازی لە فەرماندەی هێزەکانی هاوپەیمانان کرد

ڕۆژی ٢٢ی تشرینی یەکەمی ٢٠٢٤، فەریق روکن عیسا عوزێر، سەرۆکی ئەرکانی وەزارەتی کاروباری پێشمەرگە لە دیوانی وەزارەت، پێشوازی لە کۆڵۆنێڵ راب براندستێتەر، فەرماندەی هێزەکانی هاوپەیمانان لە هەرێمی کوردستان و شاندێکی یاوەری کرد.
تەوەری سەرەکیی کۆبوونەوەکە تایبەت بوو بە کاروباری فیرقەکان و جێبەجێکردنی بەرنامە و پلانی چاکسازی لە وەزارەت و ڕێکخستنەوەی تەواوی هێزەکان، هەروەها بارودۆخی هەنووکەییی هێزی پێشمەرگە و پەرەپێدانی پەیوەندیی وەزارەتی کاروباری پێشمەرگە و هاوپەیمانان خرایە بەرباس، هەردوولا هاوڕا بوون لەسەر خێراکردنی هەنگاوەکان بە ئاراستەی یەکخستنەوەی یەکە جیاوازەکانی هێزی پێشمەرگە بۆ سەر وەزارەتی پێشمەرگە و ڕێکخستنیان لە چوارچێوەی فیرقەکاندا.