بەڕێوەبەری گشتیی ڕاگەیاندن و هۆشیاریی نیشتمانی پێشوازی لە بەرپرسی پەیوەندییەکانی سوپای ئەڵمانیا کرد
ڕۆژی پێنجشەممە ٢٤ی تشرینی دووەمی ٢٠٢٤، لیوا عوسمان محەمەد مستەفا، بەڕێوەبەری گشتیی ڕاگەیاندن و هۆشیاریی نیشتمانی، پێشوازی لە مێجەر ماتیاس، بەرپرسی تیمی پەیوەندییەکانی سوپای ئەڵمانیا لە هەرێمی کوردستان و شاندێکی یاوەری کرد.
لەو دیدارەدا، مێجەر ماتیاس کۆتاییهاتنی ئەرکەکەی ڕاگەیاند و(کۆڵۆنێڵ ئەنتۆنیۆ)ی وەک جێگرەوە بۆ بەڕێوەبردنی کاروبارەکانی تیمی ڕاوێژکارانی سەربازیی سوپای ئەڵمانیا لە هەرێمی کوردستان و وەزارەتی کاروباری پێشمەرگە ناساند.
بەڕێوەبەری گشتیی ڕاگەیاندن سوپاس و ستایشی مێجەر ماتیاسی کرد، کە لە ماوەی کارکردنیدا وەک بەرپرسی پەیوەندییەکان لە سوپای ئەڵمانیا، ڕۆڵێکی بەرچاوی هەبووە لە ڕێکخستنی هەماهەنگی لەگەڵ هێزی پێشمەرگەی کوردستان و هیوای خواست لە ئەرکی داهاتووی سەرکەوتوو بێت و داوای لێ کرد کە ئەو وەک نوێنەری ڕاستەقینەی هێزی پێشمەرگە لەناو سوپا و گەلی ئەڵمانیا، ڕۆڵی لە ناساندنی کولتووری مرۆڤدۆستانەی هێزی پێشمەرگە و گەلی کورد هەبێت.
