تاقیکردنەوەی ئەزموونی بۆ دەنگدانی تایبەت لە وەزارەتی کاروباری پێشمەرگە ئەنجام درا

ڕۆژی پێنجشەممە، ٢١ی ئابی ٢٠٢٥، بە ئامادەبوونی ئەندامانی کۆمسیۆنی هەرێمی کوردستان، دەستەی باڵای هەڵبژاردنەکانی سەر بە عێراق، لە دیوانی وەزارەتی کاروباری پێشمەرگە، بۆ جاری دووەم تاقیکردنەوەی ئەزموونی بۆ جیهازەکانی دەنگدان بۆ پەرلەمانی عێراق ئەنجام درا.
لەم دەنگدانە ئەزموونییەدا، ئامێری نوێی هەڵبژاردن بە شێوەیەکی تەکنیکی، چەند تایبەتمەندییەکی نوێیان بۆ زیاد کراوە وەک: ناسینەوەی ڕووخسار لە حاڵەتی نەخوێندنەوەی پەنجەمۆردا، هەروەها خوێندنەوەی QR کۆد و ئەو کەسانەی پێشتر کێشەی پەنجەمۆریان هەبووە و لە سیستەمی دەنگدان تۆماریان کردووە؛ دەتوانن لەداهاتوودا بەبێ هیچ کێشەیەک دەنگ بدەن.
پرۆسەی تاقیکردنەوەکە بە سەرپەرشتیی عەمید عەبدولوەهاب عەبدوڵڵا ئیبراهیم، سەرۆکی لیژنەی هەڵبژاردن، عەمید هیوا شەریف، ئەندامانی لیژنەی هەڵبژاردنەکان لە وەزارەتی پێشمەرگە بەڕێوە چوو.
ئەم تاقیکردنەوەیە هەنگاوێکی گرنگە، بۆ پاراستنی دیموکراسی و دڵنیایی لە ڕاستگۆیی پرۆسەی هەڵبژاردنی تایبەت بە هێزی پێشمەرگە لە هەرێمی کوردستاندا.