سەرۆکی ئەرکانی وەزارەتی کاروباری پێشمەرگە پێشوازی لە بەرپرسی نووسینگەی هاریکاری ئاسایش کرد
ڕۆژی دووشەممە، ٢٥ی ئابی ٢٠٢٥، فەریق روکن عیسا عوزێر، سەرۆکی ئەرکانی وەزارەتی پێشمەرگە، پێشوازی لە کۆڵۆنێڵ دێک پیلوێک، بەرپرسی نووسینگەی هاریکاری ئاسایش، لە کونسوڵخانەی گشتیی ئەمریکا لە هەرێمی کوردستان و تیمێکی یاوەری کرد.
لەو دیدارەدا، کە لیوا روکن محەممەد سەعید، بەڕێوەبەری هەماهەنگی و پەیوەندییەکانی وەزارەت ئامادەیبوو، سەرۆکی ئەرکان بەخێرهاتنی بەرپرسی نوێی نووسینگەی هاریکاری ئاسایشی کرد و هیوای خواست لە ئەرک و کارەکانیدا سەرکەوتوو و هاوکار بێت، بۆ جێبەجێکردنی تەواوی ئەو پرۆژانەی بواری چاکسازی، کە وەزارەتی پێشمەرگە کاری لەسەر کردوون و ئێستا بەردەوامییان هەیە.
لە تەوەرێکی دیکەدا، کۆڵۆنێڵ دێک، هەنگاوەکانی جێبەجێکردنی یاداشتنامەی لێکتێگەیشتنی نێوان وەزارەتی پێشمەرگە و وەزارەتی بەرگریی ئەمریکای بەرز نرخاند؛ هاوکات بەردەوامی هاوکارییەکانی هاوپەیمانان، بەتایبەتی هاوکارییەکانی تیمی ڕاوێژکارانی سەربازیی ئەمریکای بۆ هێزی پێشمەرگەی کوردستان دووپات کردەوە و بەڵێنیدا کە وەک بەرپرسانی پێشووی نووسینگەی هاریکاری ئاسایش، بەردەوام دەبێت لە ئەرکەکانی و هەوڵی زۆر دەدات بۆ جێبەجێکردنی تەواوی بەندەکانی لێکتێگەیشتنی هاوبەشی نێوان وڵاتەیەکگرتووەکانی ئەمریکا و وەزارەتی پێشمەرگە.
