سەرۆکی ئەرکانی وەزارەتی کاروباری پێشمەرگە پێشوازی لە فەرماندەی هێزەکانی هاوپەیمانان کرد
ڕۆژی دووشەممە، ٢٥ی ئابی ٢٠٢٥، فەریق روکن عیسا عوزێر، سەرۆکی ئەرکانی وەزارەتی کاروباری پێشمەرگە، لە دیوانی وەزارەت، پێشوازی لە کۆڵۆنێڵ جۆزێف سال، فەرماندەی هێزەکانی هاوپەیمانان لە هەرێمی کوردستان و تیمێکی یاوەری کرد.
لەدیدارێکدا، پرسی چاکسازی لە وەزارەتی پێشمەرگە و بەردەوامیدان بە پێشخستنی یەکەی مەشقی ستافی فیرقەکان، گفتوگۆی لەسەر کرا. سەرۆکی ئەرکان دووپاتی کردەوە کە گرنگە ئەم یەکە مەشقییانە لە کات و ساتی خۆیدا بەشێوەیەکی ڕێک بەردەوام بێت، بۆ ئەوەی ستافی فیرقەکان لە ئەرک و کارە نوێیەکانیان لەڕووی سەرکردایەتی و کۆنتڕۆڵەوە، شارەزایی و ئەزموون پەیدا بکەن.
لە هەمانکاتدا تیشکخرایە سەر ئەرک و کارەکانی تیمی ڕاوێژکارانی سەربازیی هێزەکانی هاوپەیمانان لە ناو دیوانی وەزارەت و یەکەکان. هەروەها سەرۆکی ئەرکان ڕایگەیاند: "سوپاسی هاوپەیمانان و تیمی ڕاوێژکارانیان دەکەم، کە ماندوونەناسانە شانبەشانی ئێمە لە وەزارەتی پێشمەرگە کاریان کردووە؛ پشوودرێژيی وڵاتانی دۆست و هاوپەیمان و به‌رده‌واميى هاوکارییان بۆ پرۆسەی چاکسازی و یەکخستنی پێشمەرگە هاوکار بووە، کە پرۆسەکە نزیک بێت لەوەی بگات بە ئامانجی کۆتایی".
