وەزیری کاروباری پێشمەرگە پێشوازی لە شاندێکی هاوپەیمانان کرد
ڕۆژی دووشەممە، ٢٥ی ئابی ٢٠٢٥، شۆڕش ئیسماعیل، وەزیری کاروباری پێشمەرگەی حکومەتی هەرێمی کوردستان، بە ئامادەبوونی فەریق روکن عیسا عوزێر، سەرۆکی ئەرکان، پێشوازی لە کۆڵۆنێڵ دێک پیلوێک، بەرپرسی نووسینگەی هاریکاری ئاسایش لە کونسوڵخانەی گشتیی ئەمریکا لە هەولێر و تیمێکی یاوەری کرد.
لە کۆبوونەوەیەکی فراواندا کە ژمارەیەک لە بەڕێوبەرانی گشتیی وەزارەتی پێشمەرگە و تیمێکی ڕاوێژکارانی هاوپەیمانان لە هەرێمی کوردستان ئامادەبوون، دواین تازەگەرییەکان و چۆنیەتیی بەڕێوەچوونی کەیسەکانی وەزارەتی پێشمەرگە، تایبەت بە هەڵسەنگاندنی یاداشتنامەی لێکتێگەیشتنی نێوان وەزارەتی پێشمەرگە و وەزارەتی بەرگریی ئەمریکا، گفتوگۆی لەسەر کرا.
لەو کۆبوونەوەیەدا، وەزیری پێشمەرگە دووپاتی کردەوە، کە پلانی وەزارەت هەنگاوی باشی بڕیوە و بە بەرپرسیارییەتییەوە کار بۆ جێبەجێکردنی بەرنامە و پلانە ستراتیژییەکانی وەزارەتی پێشمەرگە، لە پرۆسەی یەکخستنەوەی هێزەکان دەکرێت؛ ئاماژەی بەوەشدا کە هێزی پێشمەرگەی کوردستان، ئامانجی بەدەستهێنانی بەشێکی بنەڕەتییە لە پرۆسەی چاکسازی و مەبەستییەتی ڕێکخستەوەی هێزی پێشمەرگەی کوردستان بۆ بنیاتنانی سوپایەکی یەکگرتووی نیشتیمانی بێت، کە دواجار دەبێتە نەخشەڕێگایەک بۆ گەیشتن و بەدەستهێنانی ئایندەی چاوەڕوانکراوی وەزارەتی پێشمەرگە.
لەکۆتاییی کۆبوونەوەکەدا، تیمی ڕاوێژکارانی هێزەکانی هاوپەیمانان لە هەرێمی کوردستان، ئاماژەیان بەوەدا کە بەگرنگییەوە لە هەوڵەکانی وەزارەتی پێشمەرگە دەڕوانن، بۆ جێبەجێکردنی ئەو پلانانەی وەزارەت کە لەبەرنامەی کارکردنن و بە تایبەت بڕگەکانی یاداشتنامەی لێکتێگەیشتن. هەروەها ئاماژەیان بەوەدا کە بە هاوبەشی و کاری پێکەوەیی لەگەڵ پێشمەرگە دەتوانن خێرایی بە پرۆسەی چاکسازیی پێشمەرگە بدەن.
