بەڕێوەبەری چاکسازیی وەزارەتی کاروباری پێشمەرگە پێشوازی لە ڕاوێژکارانی سەربازیی هۆڵەندا و ئەڵمانیا کرد
ڕۆژی پێنجشەممە، ۲۱ی ئابی ۲٠۲٥، عمید نەوزاد محەممەد خزر، بەڕێوەبەری چاکسازیی وەزارەتی کاروباری پێشمەرگە، پێشوازی لە دوو شاندی ڕاوێژکارانی سەربازیی هێزەکانی هۆڵەندا و ئەڵمانیا لە هەرێمی کوردستان کرد.
لە دیداری یەکەمدا، بەڕێوەبەری چاکسازی، پێشوازی لە کۆڵۆنێڵ لیندا کاپێل، ڕاوێژکاری سەربازیی وڵاتی هۆڵەندا، لە وەزارەتی پێشمەرگە و هەرێمی کوردستان کرد و گفتوگۆی دوایین بەرەوپێشچونەکانی پرۆسەی ڕیفۆرمی وەزارەت کرا و هەنگاوەکانی داهاتوو خرایە بەرباس؛ لای خۆیەوە ڕاوێژکاری هۆڵەندا ئامادەیی و پاڵپشتیی خۆی بۆ پرۆسەی ڕیفۆرمی وەزارەت دووپاتکردەوە.
لە دیداری دووەمدا، بەڕێوەبەری چاکسازی، بە ئامادەبوونی ژمارەیەک لە ئەفسەرانی بۆردی چاکسازی، لەگەڵ مەیجەر سڤێن، ئەفسەری پەیوەندییەکان و هەماهەنگیی سوپای ئەڵمانیا لە هەرێمی کوردستان و تیمێکی یاوەری کۆ بووەوە.
لەکۆبوونەوەکەدا، باس لە پێشهاتەکانی پرۆسەی چاکسازیی وەزارەتی پێشمەرگە کرا و داوای پاڵپشتی و ڕاوێژی هێزی ئەڵمانیا بۆ ئەو پرۆژە چاکسازییانەی کە لە قۆناغی کارکردندان کرا؛ تیمی ئەڵمانی ئامادەیی خۆیان بۆ پاڵپشتی و دابینکردنی ڕاوێژکاری تایبەت بە پرۆژەکان دەربڕی و لەم ڕووەشەوە ئامادەیی تەواوی خۆیان بۆ هەماهەنگیکردنی زیاتر لەگەڵ بەڕێوەبەرایەتیی چاکسازی و وەزارەتی پێشمەرگە دەربڕی.
