خولێکی تایبەت بە ڕێزگرتن لە مافەکانی مرۆڤ و ڕێگریکردن لە تووندوتیژیی پەیوەست بە ململانێکان کۆتایی هات

لە ژێر چاودێریی سەرۆکی ئەرکانی وەزارەتی پێشمەرگە، فریق روکن عیسا عوزێر و بە ئامادەبوونی لیوا حافز محەممەد عەلی ئەمین سڕی، سەرۆکایەتیی ئەرکان، لیوا بەژدار ئیسماعیل، ڕاوێژکاری باڵای وەزارەتی پێشمەرگە و بە بەشداریی دیندار زێباری، ڕێکخەری ئۆفیسی ڕاسپاردە نێودەوڵەتییەکانی حکومەتی هەرێمی کوردستان، زەفیرەدین ئۆددین، بەرپرسی ئۆفیسی مافەکانی مرۆڤی نەتەوەیەکگرتووەکان لە هەرێمی کوردستان، مەراسیمی کۆتاییهاتنی خولێکی تایبەت لە ژێر ناونیشانی "ڕێزگرتن لە مافەکانی مرۆڤ و ڕێگریکردن لە تووندوتیژیی پەیوەست بە ململانێکان"، بە بەشداریی زیاتر لە ٤٠ ئەفسەری یاساییی فیرقە و لیوا و فەوجەکانی پیادەی وەزارەتی پێشمەرگە بەڕێوە چوو.
لەسەرەتادا، مەراسیمەکە بە خولەکێک وەستان بۆ ڕێزگرتن لە گیانی شەهیدانی کوردستان دەستی پێکرد؛ دواتر عمید نەوزاد محەممەد خزر، بەڕێوەبەری چاکسازی، وتەیەکی پێشکەش کرد؛ وێڕای دەستخۆشی لە بەشداربووان و مامۆستا و ڕاهێنەرەکان، جەختی لە گرنگیی هەماهەنگیی وەزارەتی پێشمەرگە، بۆ بەشداریی لەو جۆرە خولانە کردەوە، کە دەبنە مایەی بەرزکردنی ئاستی لێهاتوویی ئەفسەران، هاوشێوەی هێزە نێودەوڵەتییەکان.
لە بەردەوامی مەراسیمەکەدا، دیندار زێباری، ڕێکخەری ئۆفیسی ڕاسپاردە نێودەوڵەتییەکانی حکومەتی هەرێمی کوردستان، ئەو خولەی بە پردێکی بەهێز بۆ گەیاندنی شارەزاییی پێشمەرگە لە یاسا نێودەوڵەتییەکان لە قەڵەمدا، بە تایبەتی ئەوانەی پەیوەندییان بە مافی مرۆڤ لە کاتی ململانێکاندا هەیە.
دواتر زەفیرەدین ئۆددین، بەرپرسی ئۆفیسی مافەکانی مرۆڤی نەتەوەیەکگرتووەکان لە هەرێمی کوردستان، خۆشحاڵیی خۆی بۆ ڕێکخستنی ئەو خولە و دابینکردنی ڕاهێنەر دەربڕی و باسی لە ئاستی بەرزی پێشمەرگە لە جێبەجێکردنی ئەرک و ڕۆڵ و بەرپرسیاریەتییەکانیان بە تایبەتیش لە کاتی ململانێکاندا کرد.
لە کۆتاییدا، بەڕێوەبەری چاکسازی، سوپاسی وەزارەتی پێشمەرگە و سەرۆکی ئەرکانی کرد؛ کە هەموو ئاسانکارییەکی بۆ بەڕێوەبردنی ئەو خولە ڕەخساند و هەمووکات پاڵپشتیی تیمەکان بووە. هەروەها سوپاسی بەڕێوەبەرایەتیی هەماهەنگی و پەیوەندییەکان و بەشی تەشریفاتی وەزارەتی بۆ ڕێکخستنی ڕێوشوێن و پێداویستیی خولەکە کرد.
شایەنی باسە ئەم خولە ماوەی سێ ڕۆژی خایاند و بە هەماهەنگیی بەڕێوەبەرایەتیی چاکسازیی وەزارەتی پێشمەرگە و ئۆفیسی ڕێکخەری ڕاسپاردە نێودەوڵەتییەکانی هەرێمی کوردستان و ئۆفیسی مافەکانی مرۆڤی نەتەوەیەکگرتووەکان لە هەرێمی کوردستان بەڕێوە چوو.