سەرۆکی ئەرکانی وەزارەتی کاروباری پێشمەرگە فیرقەی حەوتی پیادەی بەسەر کردەوە
فەریق روکن عیسا عوزێر، سەرۆکی ئەرکانی وەزارەتی کاروباری پێشمەرگە، بە یاوەری ژمارەیەک ئەفسەرانی وەزارەتی پێشمەرگە، سەردانی فیرقەی حەوتی پیادەی لە سپیلک کرد و لە لایەن لیوا تاریق هەرنی، فەرماندەی فیرقە و ئەفسەری روکن و فەرماندەی لیواکانی سەر بە فیرقەی حەوتی پیادە پێشوازی لێکرا.
لە سەرەتادا، سەرۆکی ئەرکانی فیرقەی حەوت، کورتەیەکی لەسەر سنووری ئەرک و بەرپرسیاریەتیی فیرقە باس کرد و چالاکی و ئەرکەکانی لە کاتی دەستبەکاربوونی فیرقە، تا ئێستا ڕوون کردەوە.
دواتر سەرۆکی ئەرکانی وەزارەتی پێشمەرگە لە وتەیەکدا، باسی ئەرک و کارە نوێیەکانی فەرماندەی فیرقە و لیواکانی سەر بە فیرقەی حەوتی پیادە کرد و دووبارەی کردەوە کە ئەرک و پێویستییە هەنووکەییە سەربازییەکانی هێزی پێشمەرگە، گۆڕاون و پێویستە زۆر بەخێرایی خۆتان لەگەڵ ئەم بارودۆخە نوێیەدا بگونجێنن؛ بە تایبەتی لە ڕووی سەرکردایەتی و کۆنتڕۆڵکردنەوە. هەروەها سەرۆکی ئەرکان تیشکی خستە سەر گرنگیی ناوچەی ئۆپەراسیۆنیی فیرقەی حەوت و بەڵێنی یارمەتی و پشتیوانیی پێدا، بۆ ئەوەی لە ڕووی سەرکردایەتی و کۆنتڕۆڵەوە فیرقە بتوانێت کۆنتڕۆڵی یەکە مەیدانییەکانی خۆی بە شێوەیەکی باشتر بکات.
لەلایەن خۆیانەوە، فەرماندە و ئەفسەرانی فیرقە خۆشحاڵیی خۆیان بەسەردانەکەی سەرۆکی ئەرکان دەربڕی و پاشان بەجیا پوختەیەکیان لەسەر ئەرکی لیواکانیان و بەشەکان و چۆنیەتیی دابەشکردن و جێگیرکردنی هێزەکانیان بەسەر ناوچەکەدا، بۆ سەرۆکی ئەرکان ڕوونکردەوە.
هاوکات ئەفسەرانى وەزارەتى پێشمەرگە لەسەر کار و ئەرکەکانى وەزارەت، ڕێنمایى و ڕاگۆرینەوەیان لەگەڵ ئەفسەرانی بەشەکانی فیرقە کرد و گفتوگۆی پێویستیان لەسەر چۆنیەتیی باشتر بەڕێوەچوونی کاروبارە کارگێڕییەکان کرد. دواتر سەرۆکى ئەرکان تەواوى بەشەکانى بارەگای فیرقەى حەوتی پیادەى بەسەر کردەوە و دڵنیایی لە جێبەجێکردنی پێداویستییەکانیان دا.
