سەرۆکی ئەرکانی وەزارەتی کاروباری پێشمەرگە فیرقەی سێی پیادەی بەسەر کردەوە

لە چوارچێوەی بەردەوامبوونی سەردان و بەسەرکردنەوەکانی سەرۆکی ئەرکانی وەزارەتی پێشمەرگه، بۆ یەکە سەربازییەکان، فەریق ڕوکن عیسا عوزێر، سەرۆکی ئەرکانی وەزارەتی پێشمەرگە، بە یاوەری ژمارەیەک لە ئەفسەرانی وەزارەتی پێشمەرگە، سەردانی بارەگای فیرقەی سێی پیادەی کرد و لە لایەن لیوا هاشم سیتەیی، فەرماندەی فیرقەی سێ و ئەفسەرانی ڕوکنی فیرقە و فەرماندەی لیواکانی سەر بە فیرقە پێشوازی لێکرا.
دواتر لە کۆبوونەوەیەکی بەرفراواندا کە فەرماندەی فەوجەکانی سەر بەلیواکانی فیرقەی سێی پیادە ئامادەیبوون، سەرۆکی ئەرکانی فیرقەی سێ، کورتەیەکی لەسەر ئەرک و کارەکانی فیرقەی سێی پیادە و ناوچەی ئۆپەراسیۆنی پێشکەش کرد.
پاشان سەرۆکی ئەرکانی وەزارەتی پێشمەرگە، باسی لە گرنگی و بایەخی بەیەکەوە کارکردن و خۆگونجاندن لەگەڵ پرۆسەی چاکسازی و نوێبوونەوەی ئەرک و کارەکانی یەکە سەربازییەکانی سەر بە وەزارەتی پێشمەرگە کرد و ڕایگەیاند: "لە ئێستادا قۆناغی نوێ لەناو وەزارەتی پێشمەرگە دەستی پێکردووە و لە بواری سەرکردایەتی و کۆنتڕۆڵدا فیرقە بووەتە ناوەندێکی گرنگی سەرپەرشتیکردنی ژمارەیەک لیوا و یەکەی سەربازیی لە ناوچەیەکی دیاریکراو، کە لە ئایندەیەکی نزیکدا توانای شەڕکردن و ئاستی مەشقی و پێگەیشتنیان زیاتر دەبێت و بەرز دەبێتەوە بۆ ئاستێک کە بتوانن لە هەموو حاڵەتەکاندا سەرکردایەتی هێزەکانی خۆیان بکەن".
سەرۆکی ئەرکان، خۆشحاڵی خۆی پیشاندا بەوەی کە فیرقەی سێ، وەک یەکێک لە فیرقە نمونەییەکان لە وەزارەتی پێشمەرگە، توانیویەتی لە ماوەیەکی کورتدا جێپێی خۆی بکاتەوە و ناوچەی ئۆپەراسیۆنی خۆی بەتەواوەتی دیاری بکات و کۆنتڕۆڵی بەشێک لەو ناوچانە بکات، کە وەک بۆشایی ئەمنی لە سنووری چالاکی ئۆپەراسیۆنی ئەواندا مابوونەوە.
لە بەردەوامی کۆبوونەوەکەدا، فەرماندەی فیرقەی سێی پیادە، سوپاسی سەرۆکی ئەرکانی کرد، کە لەماوەی دروستبوونی فیرقەوە تاکوو ئێستا هەمیشە هاوکار و پاڵپشتیکاری ئەوان بووە؛ بۆ سەرخستن و ڕاستەڕێکردنی کاروبارەکانیان و ڕۆڵی سەرۆکایەتیی ئەرکانی لە دابینکردنی پێداویستییەکان بۆ فیرقەی سێ بەرز نرخاند.
لە کۆتاییدا، سەرۆکی ئەرکان ڕێنوێنیی پێویستی دا، بە فەرماندەی فیرقە و ئەفسەرانی فیرقە بۆ باشترکردنی ئەرک و کارەکانیان لە داهاتوودا و درێژەدانی ئەم ئاستە نمونەییە لە خزمەتکردن؛ پاشان لەبارەی پڕەنسیپە سەربازییەکان، سەرۆکی ئەرکان پابەندبوونی سەرجەم هێزەکانی بە دیسپلین و بە بڕیارەکان بەرز نرخاند و وەزارەتی پێشمەرگەی وەک کۆکەرەوەی سەرجەم هێزەکان لە داهاتووی نزیکدا وێناکرد؛ هەر وەک چۆن لە پرۆژە یاسای چاکسازیی هێزەکانی پێشمەرگە بڕیاری لێدراوە.