وەزیری کاروباری پێشمەرگە سەنگەرەکانی پێشمەرگەی بەسەر کردەوە

ئەمڕۆ یەکشەممە ٣٠ی ئاداری ٢٠٢٥، شۆڕش ئیسماعیل، وەزیری کاروباری پێشمەرگە، بە یاوەری عیسا عوزێر، سەرۆکی ئەرکان، بۆ پیرۆزباییکردنی جەژنی ڕەمەزان، سەردانی سەنگەرەکانی هێزی پێشمەرگەی کوردستانی لە سنووری ئەرک و بەرپرسیارییەتیی لیوای یەکی پیادە کرد و لەلایەن فەرماندەی لیوا و ئەفسەران و پلەداران و پێشمەرگە قارەمانەکان پێشوازییان لێ کرا و لە سەردانەکەدا باس لە کاروچالاکییەکانی لیوای یەک و هەوڵەکان بۆ بەرەوپێشبردن و بەرزکردنەوەی توانا سەربازییەکانی هێزی پێشمەرگە لەو لیوایەدا و دۆزینەوەی میکانیزمی چارەسەر و کۆتاییهێنان بە کێشەکان کرا.
وەزیری پێشمەرگە؛ خۆشحاڵیی خۆی دەربڕی کە جەژن لەگەڵ پێشمەرگە و لە سەنگەرەکانی پێشەوەی بەرگری بەرز ڕادەگرێت و ڕایگەیاند: خۆشحاڵبـووین، لە نزیکەوە لەگەڵ ئەفسەران و پێشمەرگە قارەمانەکان بووین و گوێبیستی داواکارییەکانیان بووین.
لەبارەی گیانفیدایی و تێکۆشانی ئەفسەران و پێشمەرگەکانی لیوای یەک، وەزیری پێشمەرگە ئاماژەی بەوە دا: ڕۆڵی باڵای ئەفسەران و پێشمەرگە قارەمانەکانی لیوای یەکی پیادە بەرز دەنرخێنین، بە تایبەتی کە لە ڕووبەڕووبوونەوەی داعش و پارێزگاریکردن لە خاکی هەرێمی کوردستان، چەندین شەهیدیان بەم نیشتمانە بەخشیوە.
لە کۆتاییدا لەلایەن وەزیری پێشمەرگە و سەرۆکی ئەرکان و تیمی باڵای وەزارەتی پێشمەرگەوە پاڵپشتی و پشتیوانیی وەزارەتی پێشمەرگە بۆ لیوای یەک دووپات کرایەوە کە مەبەست لێی بەرەوپێشچوون و بەهێزتربوونی زیاتری لیوای یەکە لەو سنوورەدا.