فەرماندەی هێزەکانی پشتیوانیی یەک پێشوازی لە فەرماندەی هێزەکانی ئەڵمانیا کرد

ڕۆژی دووشەممە ٥ی ئایاری ٢٠٢٥، سیهاد بارزانی، فەرماندەی فەرماندەییی هێزەکانی پشتیوانیی یەک، پێشوازی لە کۆڵۆنێڵ کوپەر، فەرماندەی هێزەکانی ‫ئەڵمانیا لە ‫هەرێمی کوردستان‬ و شاندێکی یاوەری کرد.
لە دیدارێکدا گفتوگۆ لەبارەی هاوکاری و هەماهەنگییەکانی سوپای ئەڵمانیا بۆ هێزەکانی ‫پێشمەرگە‬ کرا، لەڕووی مەشق و لۆجستییەوە. لای خۆیەوە سیهاد بارزانی هاوکارییەکانی سوپای ئەڵمانیای بە گرنگ و پێویست زانی.
دواتر شاندی میوان مۆزەخانەی فەرماندەی هێزەکانی پشتیوانیی یەکی بەسەر کردەوە، کە تایبەتە بە تەقەمەنی و بۆمبە چێنراوەکان و چەند جۆرێک چەکی قورسی تیرۆریستان، کە لەلایەن کەتیبەی ئەندازەی سەربازیی فەرماندەییەکەوە پوچەڵ کراونەتەوە و دەستیان بەسەردا گیراوە، لە ماوەی شەڕی تیرۆریستانی داعشدا. پاشان فیلمێکی دیکۆمێنتاری پەخش کرا، کە تایبەت بوو بە کار و چالاکییەکانی فەرماندەییەکە، بە تایبەت کەتیبەی ئەندازەی سەربازیی.