سەرۆکی ئەرکانی وەزارەتی کاروباری پێشمەرگە سەنگەرەکانی پێشمەرگەی لە میحوەری پردێ بەسەر کردەوە

فەریق روکن عیسا عوزێر، سەرۆکی ئەرکانی وەزارەتی پێشمەرگە، فەریق سیهاد بارزانی، فەرماندەی هێزەکانی پشتیوانیی یەک و بەڕێوەبەری جموجۆڵی سەربازی، سەردانی بارەگای لیوای دووی پیادەیان، لە میحوەری پێنجی پێشمەرگە لە سنووری پردێ کرد و لەلایەن فەرماندەی لیوا و ئەفسەرانەوە پێشوازییان لێکرا.
لە کۆبوونەوەیەکدا، کە ئەفسەرانی باڵای هێزی پێشمەرگە ئامادەبوون، فەرماندەی لیوای دووی پیادە، پوختەیەکی دەربارەی جوگرافیای ناوچەکە و سنووری ئەرکی هێزەکانی پێشمەرگە، بۆ سەرۆکی ئەرکان ڕوونکردەوە و ئامادەییی هێزی پێشمەرگەشی لەسنووری میحوەری پێنج دەربڕی بۆ ڕووبەڕووبونەوەی هەر ئەگەرێکی نەخوازراو.
لەتەوەرێکی دیکەی ئەو سەردانەدا، سەرۆکی ئەرکان سەردانی چەند سەنگەرێکی بەرگریی هێزی پێشمەرگەی کوردستانی کرد و دۆخی سەنگەرەکانی بەرگریی هێزی پێشمەرگەی کوردستان و بارودۆخی ئەمنیی ناوچەکە و پەرەپێدانی توانای سەربازیی هێزی پێشمەرگەی لە سنوورەکە لەگەڵ فەرماندەکانی پێشمەرگە خستە بەرباس.
هەروەها بۆ ئاگاداربوون لە بارودۆخی سەنگەرسازیی خاڵەکانی پێشمەرگە لە نزیکەوە لەگەڵ ئەفسەر و فەرماندەکانی پێشمەرگە، گفتوگۆی کرد و جەختی لە تۆکمەیی سەنگەرەکانی بەرگریی پێشمەرگە کردەوە و ورەبەرزی هێزی پێشمەرگە و پابەندبوون بە دیسپلینە سەربازییەکانی پیشمەرگەی بەرز نڕخاند.
لە کۆتاییی سەردانەکەیاندا، سەرۆکی ئەرکان ئاماژەی بەوەدا: کە سەنگەرسازیی خاڵەکانی پێشمەرگه لەپێناو پاراستنی گیانی پێشمەرگە و توندوتۆڵکردنی سەنگەر و بارەگاکانی هێزی پێشمەرگەیە؛ وێرای ئەوەش وەک بونیادێکە، کە بارتەقای گەورەیی و شکۆی پێشمەرگه بێت؛ سەرەڕای پڕۆسەی سەنگەرسازی، بە ئامانجی پەرەپێدانی توانا سەربازییەکانی هێزی پێشمەرگە لە پێداویستیی لیوای دوو و کەموڕییەکانی کۆڵیەوە و جەختی لەدابینکردنی پێویستییە سەربازییەکان کردەوە.