لە بنکەی مەشقی پیادەی دهۆک خولی ژمارە یەکی ئەفسەرانی پۆل کۆتایی هات
بە مەبەستی پەرەپێدان بە تواناکانی هێزەکانی پێشمەرگە، ڕۆژی پێنجشەممە، ٢٧ی تشرنی دووەمی ٢٠٢٥، بە ئامادەبوونی لیوا روکن بەختیار محەممەد ئەمینداری گشتیی وەزارەتی پێشمەرگە، لیوا روکن هۆشمەند حەیدەر، لیوا روکن ڕێبوار عەلی کەریم، جێگرانی سەرۆکی ئەرکان، ڕاوێژکاری باڵای وەزارەت، بەڕێوەبەری جموجۆڵی سەربازی، بەڕێوەبەری گشتیی ڕاگەیاندن، کۆڵۆنێڵ فۆگیت نوێنەری وەزارەتی بەرگری ئەڵمانیا، کۆڵۆنێڵ سێبستیان کلینیك فەرماندەی هێزەکانی ئەڵمانیا لە هەرێمی کوردستان، ژمارەیەك بەڕێوەبەری گشتی و ئەفسەری باڵای وەزارەتی پێشمەرگە، لە بنکەی مەشقی پیادەی دهۆك، کۆتایی بە خولی ژمارە یەکی ئەفسەرانی پۆل هات، کە لەلایەن هێزەکانی ئەڵمانیاوە بۆ ئەفسەرانی پۆل لە بنکەی مەشقی پیادەی دهۆك ڕێکخرابوو.
خولەکە بۆ ماوەی حەوت هەفتە بەردەوام بوو، ١٠ ئەفسەری پۆل لە بنکەی مەشقی پیادەی دهۆك بەشداربوون، تیایدا بەشداربووان لە سەرجەم بوارەکانی زانستیی سەربازیدا، بەشێوەی تیۆری و پڕاکتیکیی وانەکانیان خوێند و مەشق و ڕاهێنانەکانیان ئەنجام دا؛ ئەمەش بۆ ئەوەی ببن بە مامۆستا بۆ پێگەیاندنی ئەفسەرانی پۆل لە ئاییندەدا.
شایانی باسە پڕۆژەی ئەفسەرانی پۆل لەلایەن هێزەکانی ئەڵمانیاوە پشتگیری دەکرێت و بە هەماهەنگیی لەگەڵ وەزارەتی پێشمەرگە بەڕێوەدەچێت، وابڕیارە ئەم پڕۆژەیە بەردەوام بێت و بنکەکانی مەشقی پیادەی کەرکوك و سلێمانیش بگرێتەوە. لە کۆتاییی خولەکەشدا بڕوانامە بەخشرایە بەشداربووان.
