ساڵیادی شەهیدانی لیوای پێنجی وەزارەتی کاروباری پێشمەرگە بەرز ڕاگیرا
ڕۆژی پێنجشەممە، ٢٧ی تشرینی دووەمی ٢٠٢٥، لە ساتێکی پڕ لە خەم و سەربەرزییدا، ئەفسەران و پێشمەرگەکانی لیوای پێنجی پیادە، یادی ئەو شەهیدانەیان بەرز ڕاگرت کە بە قوربانیدانی گیانی خۆیان، خاکی پیرۆزی کوردستانیان لە دڕندەیی و تاریکایی تیرۆرستانی داعش پاراست.
لە ساڵیادی ئەم ڕۆژە خەمگینەدا، ئەفسەران و پێشمەرگەکانی لیوای پێنجی پیادە، تاجە گوڵینەیان لەسەر دیواربەندی هاورێ شەهیدە نەمرەکانیان دانا و بە دڵێکی پڕ لە سۆز و خەمگین، یادی ئەو جوامێرانانەیان کردەوە کە بە ڕژاندنی خوێنی پاکیان، ئاسایش و ئاسوودەیییان بە گەلەکەیان بەخشی و بەڵێنیان دووپات کردەوە کە دەستیان لە پارێزگاریی ئەو ڕێگا و ڕێبازە نەتەوەییە بەرنەدەن، کە شەهیدان بە نرخی گیانی خۆیان بوونە قەڵغانێکی پۆڵایین بەرامبەر بە هەڕەشە و مەترسیەکانی سەر گەلەکەیان و بە خوێنی ئاڵی خۆیان پارێزگاریان لە خاکی پیرۆزی کوردستان کرد.