مانگانه دوو هه‌زار هاووڵاتی سه‌ردانی سه‌نته‌ری دڵ ده‌كه‌ن له هه‌ولێر
هەولێر، هەرێمی کوردستان، عێراق (GOV.KRD)- یه‌كێك له پێشكه‌وتووترین نه‌خۆشخانه‌كانی دڵ له‌سه‌ر ئاستی عێراق و هه‌رێمی كوردستان، نه‌خۆشخانه‌ی سەنتەری دڵه لە هه‌ولێری پایته‌خت، له‌م نه‌خۆشخانه‌یه‌دا چه‌ندین جۆری خزمەتگوزاری جیاواز پێشکەش بە نەخۆشه‌كان دەکرێت و نرخی خزمەتگوزارییە تەندروستییەکانیش جیاوازییه‌كی زۆریی له‌گه‌ڵ نەخۆشخانە تایبەته‌كان هه‌یه و له مانگێكدا 2000 دوو هه‌زار نه‌خۆش سه‌ردانی ئه‌م سه‌نته‌ره ده‌كه‌ن.
ڕۆژانه 100 بۆ 150 هاووڵاتی سه‌ردانی ئه‌م نه‌خۆشخانه‌یه ده‌كه‌ن
دكتۆر شه‌هاب عه‌لی به‌ڕێوه‌به‌ری سه‌نته‌ری دڵ، سه‌باره‌ت به خزمه‌تگوزارییه‌كانی ئه‌م نه‌خۆشخانه‌یه، بۆ به‌فه‌رمانگه‌ی میدیا و زانیاری گوتی : ڕۆژانه 100 بۆ 150 نه‌خۆش سه‌ردانی نه‌خۆشخانه‌كه‌مان ده‌كه‌ن و چاره‌سه‌ری پێویست وه‌رده‌گرن، ئه‌و حاڵه‌تانه‌ی دێنه سه‌نته‌ره‌كه‌مان جیاوازن هه‌ندێكیان ئه‌وانه‌ن كه تووشی
گیرانی دەمارەکانی دڵ بوونه یان ئه‌و منداڵانه‌ن كه له زكماكه‌وه كێشه‌ی دڵیان هه‌یه و ئێمه‌ش چاره‌سه‌ری پێویستیان بۆ ئه‌نجام ده‌ده‌ین وه‌كو قەستەرە یان ئه‌گه‌ر پێویستی به نه‌شته‌رگه‌ری هه‌بێت بۆی ده‌كرێت، ڕۆژانە هاووڵاتیان نەک تەنیا لە هەولێر بەڵکو لە پارێزگاکانی تری کوردستان وەکو دهۆک و سلێمانی و تەنانەت پارێزگاکانی ناوه‌ڕاست و خوارووی عێراقیش خه‌ڵك بۆ وه‌رگرتنی چارهسهریی سه‌ردانی سه‌نته‌ری دڵ ده‌كه‌ن، ئه‌مه‌ش بۆ ئه‌وه ده‌گه‌ڕێته‌وه كه کوالێتی و توانای نەخۆشخانەو ئەزموونی دکتۆرەکان و کارمەندەکان له ئاستێكی به‌رز دایه، ڕۆژانە لە بەشی پێشوازی زیاتر لە100 بۆ 150 نەخۆش سەردانی نەخۆشخانە دەکەن و لەوێ پێشوازی دەکرێن بۆ پشكنین و چاودێریكردنی ته‌ندروستییان، 135 نه‌شته‌رگه‌ری و 100 قه‌سته‌ره و باڵۆن مانگانه له‌م نه‌خۆشخانه‌یه‌ئه‌نجام ده‌درێت .
به‌ڕێوه‌به‌ری سه‌نته‌ری دڵ زیاتر گوتی: زیاد لەسەد ئامێری ئیکۆمان هەیە و ڕۆژانە ۳٠ هەتا ٤٠ ئیکۆی چارەسەری ده‌ستنیشانكردن و چاره‌سه‌ركردن ئه‌نجام ده‌درێت ، هه‌روه‌ها له سه‌نته‌ره‌كه‌مان ڕۆژانه ٥ هەتا ۸ نەشتەرگەری دڵ دەکرێت.
لە سێ مانگی یەکەمی ئه‌مساڵدا لە نەخۆشخانەی سه‌نته‌ری دڵ ٤٦۳٥٠ چاره‌سه‌ری جۆراو جۆر بۆ نه‌خۆشه‌كان پێشكه‌ش كراوه لەنێویاندا ۱٤۸٠ قه‌سته‌ره و شەبەکە و باڵۆنیش بۆ گیرانی دەمارەکانی دڵ ۱٠۱۸ حاڵه‌ت بووه ، هەروەها ۳٦۸ (فتح صدر ) ، لە هەمان کاتدا ٥۳۷٤ حاڵەتی ڕاوێژیی بۆ نه‌خۆشه‌كان كراوه، هەروەها ۷۳۳٥ حاڵەتی ئیکۆ بە نۆرماڵ و نازور ئه‌نجام دراوه، له سه‌نته‌ری دڵ بەشی ستیی سکانمان هەیە و مفراسی دەمارەکانی دڵ بەشێکی زۆر پێشکەوتووە لە هەموو عێراق لەڕووی ئامێرەکان و پزیشکەکان و ڕاپۆرتی ده‌ستنیشانكردنی نه‌خۆشیمان زۆر پێشکەوتووه .
516 كارمه‌ند و پزیشك له‌و سه‌نته‌ره‌دا به‌رده‌وام له ئه‌ركدان
دكتۆر شه‌هاب عه‌لی به‌ڕێوه‌به‌ری سه‌نته‌ری دڵ له درێژه‌ی قسه‌كانی بۆ فه‌رمانگه‌ی میدیا و زانیاری باسی له نرخ و ماوه‌ی كاركردنی ستافی ئه‌م سه‌نته‌ره كرد و گوتی: ئەو نەخۆشخانە قازانج نه‌ویسته له پاڵ حکومەت خزمەتی هاووڵاتیان دەکەین، نرخی خزمەتگوزاریەکان لەنێوان ۱٥ تا ۳٠٪ جیاوازی هەیە، هەندێک بەشی هەیە وەک شەبەکە و باڵۆن بەڵام کوالێتیەکەی دەتوانین بڵێین سەدا پێنج فەرقی هەیە لەبەر بوونی کەرەستەو پێداویستی و دکتۆری پسپۆر و بەشەکانی ئای سی و بی سی کە بۆ ماوەی ۲٤ کاتژمێر کاردەکەن و ئەزموونێکی زۆرباشیان هەیە لەچارەسەر کردن و چاودێریكردنی نەخۆش، نه‌خۆشخانه‌ی سه‌نته‌ری دڵ 24 کاتژمێر له خزمه‌تی هاووڵاتیاندایه و ده‌رگامان كراوه‌یه تەنانەت لەڕۆژانی پشوو و ڕۆژانی هەینیش، ئێشكگر و پزیشکی پسپۆریش به‌رده‌وام له نه‌خۆشخانه‌كه‌مان ئامادەنه و به‌یانیانیش ٤ هۆڵی قەستەرە و ٤ هۆڵی نه‌شته‌رگه‌ری له نه‌خۆشخانه‌كه‌مان بەردەوام خزمه‌ت به هاووڵاتیان ده‌كه‌ن و 516 كارمه‌ند و پزیشك له‌و سه‌نته‌ره‌دا به‌رده‌وام له ئه‌ركدان.
% 95 ی ئه‌وانه‌ی سه‌ردانی ئه‌م سه‌نته‌ره ده‌كه‌ن چاره‌سه‌ری پپێویستیان بۆ ده‌كرێت
سه‌باره‌ت به‌و هاووڵاتیانه‌ی سه‌ردانی نه‌خۆشخانه‌ی سه‌نته‌ری دڵ ده‌كه‌ن به مه‌به‌ستی وه‌رگرتنی چاره‌سه‌ر دكتۆر شه‌هاب عه‌لی ئاماژه‌ی به‌وه دا كه به هۆی ئه‌وه‌ی پزیشکەکانی ئه‌و سه‌نته‌ره لەو بوارەدا ئه‌زموونی نزیکەی ۱٥ ساڵی كاركردنیان هه‌یه، بۆیه دەتوانین بڵێین %95 ی نەخۆشیەکانی دڵ بۆ گەورەکان له‌و سه‌نته‌ردا چاره‌سه‌رییان بۆ ده‌كرێت و ئەزموون و ئاستی خزمەتگوزاری نەخۆشخانەکەش له ڕووی نرخ و كوالێتییه‌وه بۆ خه‌ڵكی ڕوون و ئاشكرایه و جیاوازه له هه‌موو شوێنه‌كانی دیكه.
به‌ڵام هه‌ندێك شت هه‌یه پێویسته خه‌ڵك لێی تێبگات ئه‌ویش ئه‌وه‌یه كه سه‌نته‌ری دڵ مەرج نیە بتوانێت چارهسهریی هه‌موو حاڵه‌ته‌كان بكات ئه‌وه‌ش له هه‌موو دونیادا هه‌یه، بۆیه ناكرێت بڵێن لەکوردستان ناتوانن چارەسه‌ری بکەن چونكه هه‌ندێك نه‌خۆشیی هه‌یه ئه‌گه‌ر نه‌خۆشه‌كه بچێته ده‌ره‌وه‌ش ڕه‌نگه چاره‌سه‌ری بۆ نه‌دۆزرێته‌وه، ئه‌مه‌ش ئه‌وه‌مان پێ ده‌ڵێت كه ئێمه‌ش بێ به‌ش نینه له كه‌م و كوڕی له ڕووی شوێن و ئەزموون و پشتگیری، بۆ نموونه ئێمه كه‌م و كوڕیمان هه‌یه له سەپۆرتکردنی منداڵان. له‌گه‌ڵ ئه‌‌وه‌شدا دەتوانین بڵێین زیاتر لە ۹٥٪ چارەسەری لێرە هەیە بۆ نموونە نەخۆش هەبووە لە وڵاتی تورکیا یان ئێران ڕه‌تیان كردۆته‌وه وه‌ریبگرن گوایە حاڵەتەکەی مه‌ترسیداره و نەشتەرگەریان بۆ نەکردووە و باری تەندروستیشی ڕۆژ بە ڕۆژ خراپتر بووە ، به‌ڵام سەردانی ئێرەیان کردووە و پزیشکەکانمان وەکو تیمێكی شاره‌زا چارەسەریان كردووه.
جێی ئاماژه‌یه له سه‌نته‌ری دڵ 17 جۆر خزمەتگوزاریی جیاواز پێشکەش بە نەخۆشه‌كان دەکرێت و نرخی خزمەتگوزارییە تەندروستییەکانیش 20%ـی نرخی نەخۆشخانە تایبەتییەکانە و له مانگێكدا 2000 دوو هه‌زار نه‌خۆش بۆ وه‌رگرتنی چارهسهریی ڕوو له‌م نه‌خۆشخانه‌یه ده‌كه‌ن.
فه‌رمانگه‌ی میدیا و زانیاری
15 ی نیسانی 2022