سایلۆی هەڵەبجە بە گوژمەی ٢٧ ملیار دینار جێبەجێ دەکرێت
![](/media/25211/img-20240216-wa0000.jpg?anchor=center&mode=crop&width=1200&height=630&rnd=133525540670000000)
سایلۆی هەڵەبجە بۆ عەمبارکردنی گەنمی جوتیارانی دەڤەرەکە خرایە بواری جێبەجێکردن، کە توانای عەمبارکردنی ٤٠ هەزار تەن گەنمی دەبێت.
سایلۆکە لەسەر ڕووبەری ٥٢ دۆنم زەوی دروست دەکرێت؛ تێچووی دروستکردنی ٢٧ ملیار و ٥٠٠ ملیۆن دینارە؛ ماوەی جێبەجێکردنی دوو ساڵە و سێ مانگە دەست بە دروستکردنی کراوە.
ستار مەحموود، بەڕێوەبەری گشتیی کشتوکاڵی هەڵەبجە دەڵێت: “سایلۆکە توانای هەڵگرتنی ٤٠ هەزار تۆن گەنمی دەبێت، لەگەڵ ١٠ کۆگا بۆ هەڵگرتنی دانەوێڵەکان".
جوتیارانی ناوچەکە بەو هەنگاوە حکومەت دڵخۆشن و پێیان وایە دەبێتە هۆی بووژانەوەی کشتوکاڵ و ئابووریی ناوچەکە.
خەسرەو محەممەد، جوتیارێکی پارێزگای هەڵەبجەیە، لەمبارەیەوە دەڵێت: “ئەم پرۆژەیە یەکێکە لە پرۆژە گرنگ و پێویستەکانی حکومەتی هەرێمی کوردستان بۆ پارێزگای هەڵەبجە؛ دڵخۆشین بەوەی گەنمەکانمان جارێکی تر لەوێدا هەڵدەگیرێن، دەپارێزرێن و بەبازاڕ دەکرێن".
کابینەی نۆیەم گرنگییەکی تایبەتی بە دروستکردنی سایلۆکان لە ناوچە جیاجیاکانی هەرێمی کوردستان داوە؛ چونکە بنەمایەکی گرنگی ئاسایشی کشتوکاڵی و ئابوورییە.
فەرمانگەی میدیا و زانیاری