عەلوەی ئاکرێ بە گوژمەی ٢٢ ملیۆن دۆلار جێبەجێ دەکرێت
عەلوەی ئاکرێ بە گوژمەی ٢٢ ملیۆن دۆلار لەسەر ڕووبەری ٢٤٥ هەزار مەتر دووجا، جێبەجێ دەکرێت؛ کە دووەم گەورەترین عەلوەیە لەسەر ئاستی هەرێمی کوردستان و عێڕاق.
عەلوەی ئاکرێ لە ١٩ دوکان، ٢٠ کۆگا و ٤٨ عەلوە، ٣٥ بنکەی فرۆشتن، ١١٢ عەلاف، ٨ ساردکەری بەفرگر و ١١ ساردکەری ئاسایی پێک دێت؛ هەروەها لەگەڵ ناوچەیەکی سەوزایی بە ڕووبەری نزیکەی ٥ هەزار مەتر دووجا.
عەلوەکە ٢ قەپان و گۆڕەپانی وەستانی ئۆتۆمبێل و بنکەیەکی تەندروستی و بنکەیەکی پۆلیس، ئاگرکوژێنەوە و وێستگەی سووتەمەنی، ڕێستورانت و سووپەرمارکێت و مزگەوت لەخۆ دەگرێت.
عەلوەی ئاکرێ پڕۆژەیەکی ستراتیژیی کشتوکاڵییە، بە پلانێکی پێشکەوتوو و مۆدێرن بنیات دەنرێت؛ لە ڕێگەی بنکەی فرۆشتنی ڕاستەوخۆوە جوتیاران و بازرگانان بە ئاسانی بەروبوومەکانییان بەبازاڕ دەکەن.
عەلوەکە لە ڕووی جوگرافییەوە یەک کاتژمێر لەهەریەک لە هەولێر و دهۆک دوورە و ٤٠ خولەکیش لە موسڵەوە؛ ئەوەش وادەکات هاتووچۆی بازرگانی بۆ عەلوەکە ئاسان بێت.
حکومەتی هەرێمی کوردستان، گەشەپێدانی بواری کشتوکاڵی بە بنەمای بەهێزبوونی کەرت و بوارەکانی دیکە دادەنێت و لە کابینەی نۆیەمدا هەنگاوی گەورەی بۆ نراوە.
فەرمانگەی میدیا و زانیاری
