بەرپرسی پەیوەندییەکانی دەرەوەی حکومەت لەگەڵ باڵیۆزی نوێی ئوسترالیا لە عێراق کۆبووەوە
![](/media/25657/1-1.jpg?anchor=center&mode=crop&width=1200&height=630&rnd=133541912750000000)
ڕۆژی دووشەممە ٤ی ئاداری ٢٠٢٤، سەفین دزەیی، بەرپرسی پەیوەندییەکانی دەرەوەی حکومەتی هەرێمی کوردستان، پێشوازی لە گلین مایلز، باڵیۆزى نوێی ئوستڕالیا لە عێراق و شاندى یاوەرى کرد.
بەرپرسى فەرمانگە بەخێرهاتنى باڵیۆزى کرد بۆ هەرێمى کوردستان و هیواى سەرکەوتنى بۆ خواست لە ئەرکى تازەى وەک باڵیۆزى ئوستڕالیا لە عێراق.
سەفین دزەیی پوختەیەکى سەبارەت بە ڕەوشی هەرێمی کوردستان لەڕووی پێشکەوتن و فراوانکردنی پەیوەندییەکان پێشکەش کرد، دواتر تیشکی خستە سەر پرسەکانی نێوان هەولێر و بەغدا و بڕیارەکانی دادگەی فیدڕالی و بایەخی ئەنجامدانی هەڵبژاردنی پەرلەمانی کوردستان و پرسی کشانەوەی هێزەکانی ئەمەریکا لە عێراق و ڕەوشی ئاوارە و پەنابەران لە هەرێم.
باڵیۆزی ئوسترالیا لە عێراق خۆشحاڵیی خۆی بۆ ئەو سەردانە دەربڕی کە توانی لەنزیکەوە ئاشنای بارودۆخەکە و تێڕوانینی حکومەتی هەرێم بێت سەبارەت بە پرسەکان. ویستیی وڵاتەکەی بۆ پتەوکردنی زیاتری پەیوەندی لەگەڵ عێراق و هەرێمی کوردستان لە بوارە جیا جیاکان دووپات کردەوە.