٧ ملیار دینار بۆ خزمەتگوزاریی تەندروستی لە هەڵەبجە خەرج دەکرێت
![](/media/25701/f90e6c3b-6872-438c-85b8-50e6c6bc873f.jpeg?anchor=center&mode=crop&width=1200&height=630&rnd=133545749680000000)
لە چوارچێوەی خزمەتگوزارییە تەندروستییەکانی حکومەتی هەرێم و لە دوای سەردانی مەسرور بارزانی، سەرۆکی حکومەتی هەرێمی کوردستان، بۆ هەڵەبجە، بڕی ٧ ملیار دینار بۆ خزمەتگوزاری و ئامێر و سەرچاوە مرۆییەکانی تەندروستی لە هەڵەبجە تەرخان دەکرێت.
د. سامان بەرزنجی، وەزیری تەندروستی، لە شاری هەڵەبجە بە فەرمانگەی میدیا و زانیاریی ڕاگەیاند: "لەسەر بودجەی حکومەتی هەرێم، بە بڕی یەک ملیار دینار ئامێر و پێداویستیی پزیشکی بۆ نەخۆشخانەی بیارە تەرخان کرا، هەروەها ١٣٠ کارمەندی تەندروستی بۆ دامەزرێنرا".
"جگە لەوە، کارگەی بەرهەمهێنانی ئۆکسجین بە بڕی ٣٨٥ ملیۆن و سەنتەری نەخۆشییەکانی شێرپەنجەی مەمک و هەرس و گەدە بە ٥٠٠ ملیۆن بەردەست کرا، جگە لە ئامبولانس و ئامێرە ستراتیژییە پزیشکییەکان و ئامێرەکانی دیکە، کە بە هەمووی ٧ ملیار دیناری تێدەچێت".
حکومەتی هەرێمی کوردستان، دابینکردنی خزمەتگوزارییە تەندروستییەکان بە لەپێشترین ئەرک دەزانێت و لەمڕووەوە خزمەتی پارێزگا و ئیدارە سەربەخۆکان دەکات.
فەرمانگەی میدیا و زانیاری