پردی دەربەندی ڕانیە بە گوژمەی زیاتر لە 12 ملیار دینار تەواو كرا
پڕۆژەی پردی دەربەندی ڕانیە یەکێکە لە پرۆژە ستراتیجییەکان؛ بەردی بناغەی لەلایەن حکومەتی هەرێمی کوردستان دانراوە و لە دوای جەژنی نەورۆز بەڕووی هاووڵاتییانی دەڤەرەكەدا دەکرێتەوە.
پردی دەربەندی ڕانیە ١٢ ملیار و ٤٠٠ ملیۆن دیناری تێچووە؛ جگە لە پردەکە کیلۆمەترێک ڕێگا لە هەردوو دیوی قیڕتاو کراوە. درێژیی پردەکە ٤٢٠ مەتر و بەرزی ٢٥ مەتر و پانی ١٥ مەترە؛ دەڤەری بیتوێن و بەری مەرگە پێكەوە دەبەستێتەوە و دەبێتە ڕێگەیەیش بۆ گەیشتنی ڕانیە بە سلێمانی.
هیوا عەبدوڵڵا، ئەندازیاری پرۆژەکەیە و لەمبارەیەیەوە بە فەرمانگەی میدیا و زانیاریی گوت: "ئەم پرۆژەیە یەکێکە لە پرۆژە ستراتیجییەکان؛ کە بە تازەترین تەکنیک کاری تێدا دەکرێت و لەڕووی هاتووچۆوە سوودێکی زۆر بە هاووڵاتییانی دەڤەری ڕاپەرین و بەری مەرگە دەگەیەنێت؛ ئاسانکارییەکی باش بۆ گواستنەوە و ساغکردنەوەی بەرهەم و کاڵاکان لە ناوچەكە دەكات".
پێشتر پردێك لە هەمان جێگە دروست كرابوو، بەڵام بەهۆی چەند گرفتێكەوە، حكومەتی هەرێم پردێكی نوێی دروست كرد، ئەمەش لەپێناو گەیاندنی خزمەتگوزاریی باشتر و سەلامەتتر بۆ شۆفێران و خەڵكی دەڤەرەكە، بەتایبەت كە لە وەزری بەهاردا ئەو ناوچەیە گەشتیاری زۆری بۆ دەچێت.
فەرمانگەی میدیا و زانیاری
