%80ی کارەکانی سایلۆی هەڵەبجە تەواو بووە

سایلۆی هەڵەبجە یەکێکە لە پرۆژە ستراتیجی و گرنگەکانی کابینەی نۆیەمی حکومەتی هەرێمی کوردستان، کە لەلایەن وەزارەتی بازرگانی و پیشەسازیی حکومەتی هەرێم، لە سنووری پارێزگای هەڵەبجە دروست دەکرێت.

سایلۆی هەڵەبجە تێچووی دروستکردنی 27 ملیار و 500 ملیۆن دینارە و توانای هەڵگرتنی 40 هەزار تۆن دانەوێڵەی هەیە؛ لەگەڵ 10 کۆگەی عەمبارکردنی خۆراک، کە قەبارەی هەریەکەیان 1200 مەتر دووجایە.

کاوە حیکمەت، سەرپەرشتیاری پرۆژەکەیە و لەم بارەیەوە بە فەرمانگەی میدیا و زانیاریی ڕاگه‌یاند: "سایلۆی هەڵەبجە لە ئێستادا قۆناغێکی باشی لە کارەکانی بڕیوە و 80%ی کارەکانی تەواو بووە؛ بۆ ساڵی داهاتوو کارەکانی تەواو دەبێت".

بە تەواوبوونی سایلۆکەش جوتیارانی هەڵەبجە و ناوچەکانی دەوروبەری، وەک گەرمیان و شارەزوور و چەندین ناوچەی تر دەتوانن سوودی زۆری لێ وەربگرن بۆ دانەوێڵەکانیان.

کابینەی نۆیەم گرنگییەکی زۆری بە دروستکردنی سایلۆکان لە ناوچە جیاجیاکانی هەرێمی کوردستان داوە؛ لەپێناو بەرەوپێشبردنی کەرتی کشتوکاڵ و خزمەتکردنی هاووڵاتییان.

فەرمانگەی میدیا و زانیاری