قوباد تاڵەبانی: رێککەوتن لەسەر یاسای نەوت و گاز دەبێت ئەولەوییەتی دانووستانەکانی پێکهێنانی حکومەتی داهاتووی عێراق بێت

هەولێر، هەرێمی کوردستان، عێراق (GOV.KRD)- قوباد تاڵەبانی جێگری سەرۆک وەزیرانی هەرێمی کوردستان لە کۆبوونەوەی لەگەڵ مارك برایسن ڕیچاردسن باڵیۆزی بەریتانیا لە عێراق جەختی کردەوە لەسەر پێویستیی رێککەوتنی هەرێم و بەغدا لەسەر پرسی نەوت و گاز و رایگەیاند دەبێت رێککەوتن لەسەر یاسای نەوت و گاز ئەولەوییەتی دانووستانەکانی پێکهێنانی حکومەتی داهاتووی عێراق بێت.
لە تەوەری سەرەکی کۆبوونەوەکەدا کە رۆژی چوار شەمە ٢٧ی تەموزی ٢٠٢٢ لە هەولێر بەڕێوەچوو و تیایدا دەیڤید هەنت کۆنسوڵی گشتی بەریتانیا لە هەرێم ئامادەی بوو، باسی گفتوگۆکانی پێکهێنانی حکومەتی داهاتووی عێراق کرا. لەم چوارچێوەیەدا جێگری سەرۆک وەزیران رایگەیاند عێراق لەوە زیاتر بەرگەی ململانێی ناپێویست لەسەر پۆست و ئیمتیاز ناگرێت و پێویستە لایەنەکان لە پرۆسەی پێکهێنانی حکومەتدا گفتوگۆکانیان لەسەر پرسە سیاسییە چارەنووسسازەکان و چۆنییەتی پێکهێنانی حکومەتێکی کارای خزمەتگوزار و چارەسەرکردنی ناکۆکییەکانی نێوان هەولێر و بەغدا چڕبکەنەوە.
قوباد تاڵەبانی جەختیشی کردەوە لەم قۆناغەدا رێککەوتن لەسەر پرسی نەوت و گاز و پەسندکردنی یاسای نەوت و گاز دەبێت لە ئەولەوییەتی دانووستانەکانی پێکهێنانی حکومەتی داهاتووی عێراق بێت چونکە رێککەوتن لەسەر ئەم پرسە زەمینەی لەبار دروست دەکات بۆ رێککەوتن لەسەر پرسە چارەنووسسازەکانیتر.
لە بەشێکیتری کۆبوونەوەکەدا جێگری سەرۆک وەزیرانی ئاماژەی دا بە کێشەکانی ژینگە و مەترسییەکانی سەر سەرچاوە ئاوییەکانی عێراق و هەرێمی کوردسان و رایگەیاند پێویستە پرسی ژینگەش لە ئەولەوییەتەکانی حکومەتی داهاتووی عێراق بێت.
لە کۆبوونەوەکەدا باڵیۆزی بەریتانیا ستایشی هەنگاوە چاکسازییەکانی حکومەتی هەرێمی کرد و ئامادەیی وڵاتەکەی دووپات کردەوە لە یارمەتیدانی هەرێمی کوردستان بۆ خێراترکردن و بەرەوپێشبردنی زیاتری پرۆسەی ریفۆرم لە دامەزراوەکانی حکومەتدا. داواشیکرد لە داهاتوویەکی نزیکدا حکومەتی هەرێم کۆبوونەوەیەکی تایبەت بۆ باڵیۆز و نێردە دیپلۆماسییەکان رێک بخات بۆ باسکردن و تاوتوێکردنی پرۆسەی ریفۆرم لە هەرێمی کوردستان.
لە بەشێکیتری کۆبوونەوەکەدا قوباد تاڵەبانی سوپاسی کۆنسوڵی گشتی بەریتانیای کرد کە بەر لە ماوەیەک سەردانی دەڤەری راپەڕینی کردوە و داوایکرد سەردانی شار و شارۆچکەکانی دیکەش بکات بۆ ئەوەی پێکەوە پلانی هاوبەش دابنێن بۆ وەبەرهێنان لەو دەڤەرانە و رەخساندنی هەلی کار بۆ دانیشتوانی شاروشارۆچکەکانی هەرێمی کورستان.