جێگرى سەرۆکی ئەنجومەنى وەزیران لەگەڵ لێپرسراوی نوسینگەى یەکێتی ئەوروپا کۆبۆوە
![](/media/10309/whatsapp-image-2022-03-03-at-33443-pm.jpeg?anchor=center&mode=crop&width=1200&height=630&rnd=133433190380000000)
هەولێر، هەرێمی کوردستان، عێراق (GOV.KRD)- قوباد تاڵەبانی جێگرى سەرۆکی ئەنجومەنى وەزیران ئەمڕۆ ٣ى ئازار لەشارى هەولێر چاویکەوت بەمارى پارێت لێپرسراوی نوسینگەى یەکێتی ئەوروپا لەهەرێمی کوردستان و پێکەوە باسیان لەدوایین گۆڕانکارییە سیاسی و ئابورییەکانی هەرێمی کوردستان و عێراق کرد.
لەبارەى دۆخی ئێستاى عێراق و هەنگاوەکانی پێکهێنانی حکومەتی نوێ و پرسە هەڵواسراوەکانی تر کەتەوەرێکی گرنگی دیدارەکەبوو، جێگرى سەرۆکی ئەنجومەنى وەزیران جەختی کردەوە کەدەبێ کێشەکان لەڕێى دیالۆگ و رێکەوتنی سیاسییەوە چارەسەر بکرێن.
هەروەک هەردوولا خوازیاربوون کە هەموو هێز و لایەنە سیاسیەکان بتوانن لەرێى گفتوگۆی بنیاتنەرەوە خاڵى هاوبەشی نێوانیان زیاتربکەن لەپێناو گەیشتن بەرێکەوتنێکی گشتگیر تا پرۆسەى سیاسی عێراق نەگاتە بنبەست و ئەم قۆناغە تێپەڕێنرێت.
لەبارەى پەیوەندییەکانی نێوان هەرێمی کوردستان و بەغداوە، قوباد تاڵەبانی دووپاتی کردەوە کەپێویستە دەستور بکرێتە بنەماى چارەسەرى کێشەکان.