قوباد تاڵەبانی لەگەڵ لایەنە ئەمنییەكانی ئیدارەی سەربەخۆی ڕاپەڕین كۆبووەوە
![](/media/27391/img_1538-1.jpg?anchor=center&mode=crop&width=1200&height=630&rnd=133624743510000000)
ڕۆژی یەکشەممە ٩ی حوزەیرانی ٢٠٢٤، قوباد تاڵەبانی، جێگری سەرۆکوەزیرانی هەرێمی کوردستان، لەگەڵ لایەنە ئەمنییەکانی ئیدارەی ڕاپەڕین کۆبووەوە.
جێگری سەرۆكوەزیرانی هەرێمی كوردستان جەختی لە ڕێگریكردن لە ڕوودانی تاوان و باشتركردنی ڕەوشی ئەمنیی دەڤەرەكە كردەوە، لە ڕێگەی چالاکترکردنی ژووری ئۆپەراسیۆنی هاوبەشەوە. هەروەها جەختی لە هەماهەنگیی زیاتر كردەوە، بۆ ڕێگریكردن لە ئەنجامدانی تاوان لە دەڤەری ڕاپەڕین و ناوچە سنوورییەكان و بەرەنگاربوونەوەی تاوانباران بەبێ گوێدانە شوناسیان و سەر بە هەر کەس و لایەنێک بن.
قوباد تاڵەبانی لایەنە ئەمنییەكانی دەڤەری ڕاپەڕینی ڕاسپارد، ژووری ئۆپەراسیۆنی هاوبەش چالاکتر بكەن بۆ بەدواداچوونی كەیسە ئەمنییەكان و دەستخۆشی لێكردن كە لەماوەی ڕابردوودا ژمارەیەك داواكراویان دەستگیركردووە و ڕێگرییان لە چەند سەرپێچی و پێشێلكارییەكی ئەمنی كردووە لە ناوچەكەدا.
گوتیشی: پێویستە هەماهەنگیی باشتان هەبێت لەگەڵ لایەنە ئەمنییەکان لە پارێزگە و شارەکانی تر، بۆ ئەوەی داواکراوان دەستگیر بکرێن و دەرباز نەبن لە یاسا.