قوباد تاڵەبانی لەگەڵ کونسوڵی گشتیی نوێی كۆمارى هیند کۆبووەوە
قوباد تاڵەبانی، جێگری سەرۆکوەزیران پێشوازی کرد لە بریجیش کومار، کونسوڵی گشتیی نوێی كۆمارى هیند لە هەرێمی کوردستان و لە کۆبوونەوەی نێوانیاندا چەند پرسی جێی بایەخی هەردوولا گفتوگۆیان لەبارەوە کرا.
لە کۆبوونەوەکەدا کە ڕۆژی چوارشەممە ١٣ی ئابی ٢٠٢٥ بەڕێوەچوو، قوباد تاڵەبانی پیرۆزباییی دەستبەکاربوونی لە کونسوڵی گشتیی نوێی كۆمارى هیند کرد و ئامادەییی نووسینگەی جێگری سەرۆکوەزیرانی دەربڕی بۆ هەموو جۆرە پشتیوانی و هاوکارییەک بۆ سەرکەوتن لە ئەرکەکەیدا. هەروەها سوپاسی کونسوڵی گشتیی پێشووی ئەو وڵاتەشی کرد لە هاوکارییەکانی بە تایبەت لە بواری پەرەپێدانی تواناکانی گەنجاندا.
لە کۆبوونەوەکەدا باس لە شێوازی حکومڕانی و پرۆسەی گەشەپێدانی هەرێمی کوردستان کرا، لەمبارەیەوە جێگری سەرۆکوەزیران ئاماژەی بە گرنگیی سەروەریی یاسا و بەهێزیی دامەزراوەکانی حکومڕانی کرد وەک بنەمایەکی سەرەکی بۆ پاراستنی سەقامگیری و گەشەسەندنی هەر وڵاتێک.
هەر لەم چوارچێوەیەدا قوباد تاڵەبانی ڕوونیشی کردەوە کە بۆ گەشەپێدان و بەهێزترکردنی کەرتی تایبەت، کار دەکەن بۆ پەرەپێدانی کارسازی و تواناکانی هێزی کاری گەنجان و سوپاسی حکومەتی هیندیشی کرد کە لە ماوەی ڕابردوودا لەمبارەیەوە هاوکاریی هەرێمی کوردستانی کردووە. داواشی کرد کونسوڵی گشتیی نوێی كۆمارى هیند زیاتر هاوکاربێت بۆ پەرەپێدانی تواناکانی گەنجان لە بوارە جیاوازەکاندا، بە تایبەتیش لە بوارەکانی کارسازی و تەکنەلۆژیادا، بەو پێیەی هیندستان ئەزموونێکی دەوڵەمەند و سەرکەوتووی لەمبارەیەوە هەیە.
