جێگرى سه‌رۆكى حكومه‌ت پێشوازى له كاربه‌ڕێكه‌رى باڵيۆزخانه‌ى ئه‌مه‌ريكا له عێراق كرد
قوباد تاڵەبانی، جێگری سەرۆکوەزیران پێشوازی لە دانیێل روبنستین، کاربەڕێکەری باڵیۆزخانەی ئەمریکا لە عێراق كرد و لە کۆبوونەوەی نێوانیاندا چەند پرسێکی جێی بایەخی هەردوولا تاووتوێ کران.
لە دەستپێکی کۆبوونەوەکەدا کە ڕۆژی پێنجشەمە 20/3/2025، بە ئامادەبوونی ستیڤن بیتنەر، کونسوڵی گشتیی ئەمه‌ریکا لە هەرێم بەڕێوەچوو، بە بۆنەی جەژنی نەورۆز، پیرۆزبایی لە گەلی کورد کرا و هەردوولا هیوایان خواست ساڵی نوێی کوردی، ساڵی ئاشتی و یەکگرتوویی و پڕ لە خۆشی و دەستکەوت بێت بۆ گەلی کورد.
لە تەوەرێکی کۆبوونەوەکەدا باسی پرۆسەی پێکهێنانی حکومەتی نوێی هەرێم کرا. لەمبارەیەوە جێگری سەرۆکوەزیران بە ئاماژەدان بە ڕێککەوتنی پارتی ديموكراتى كوردستان و یەکێتيی نيشتمانيى كوردستان، لەسەر ڕەشنووسی دیدگای هاوبەش بۆ حکومڕانی، گەشبینی خۆی دەربڕی لە ماوەیەکی نزیکدا ڕێککەوتنی کۆتایی بۆ پێکهێنانی حکومەتێکی بەهێز و کارا و یەکگرتوو بكرێت.
ڕوونیشی کردەوە پارتی و یەکێتی هەردوولا هاوڕان لەم قۆناغەدا بەپێی گۆڕانکارییەکانی ناوچەکە، هەروەها بۆ خزمەتکردنی باشتری هاووڵاتییان پێویستە حکومەتێكی کارا و خزمەتگوزار پێکبهێنرێت.
لە تەوەرێکی دیکەی کۆبوونەوەکەدا باس لە پەیوەندییەکانی نێوان هەرێم و بەغدا کرا. لەم چوارچێوەیەشدا قوباد تاڵەبانی جەختی کردەوە لەسەر پەلەکردن لە هەناردەکردنەوەی نەوتی هەرێم و ڕایگەیاند: حکومەتی هەرێم لە هەوڵدایە بۆ چارەسەرکردنی هەموو کێشە و بەربەستەکانی بەردەم دەستپێکردنەوەی هەناردەکردنی نەوت.
هەردوولاش هاوڕابوون کە یەکگرتوویی و یەکهەڵوێستی لایەنە کوردییەکان لە بەغدا کاریگەريی گەورەی لەسەر زووتر چارەسەرکردنی ناکۆکییەکانی نێوان هەرێم و بەغدا ده‌بێت.
