پەیامی پیرۆزبایی وەزارەتی ڕۆشنبیری و لاوانی حکومەتی هەرێمی کوردستان بەبۆنەی جەژنی نەورۆز و سەری ساڵی کوردییەوە

هەولێر، هەرێمی کوردستان، عێراق (GOV.KRD)- بە بۆنەی هاتنەوەی جەژنی نەورۆز و سەری ساڵی 2721 ی کوردیی، پیرۆزبایی لە گەلی کوردستان دەکەین، کە بەشکۆوە یادی نەورۆز دەکەنەوە.

جەژنی نەورۆز هێمای سەرکەوتنی هێزی ڕووناکییە بەسەر تاریکیدا و لە هەمان دەمدا موژدەی هاتنی ساڵێکی نوێیە، کە گەلی کوردستان بەپێی تایبەتمەندیی کلتووریی خۆی ئەم جەژنە بەرز و پیرۆز ڕادەگرێت.

نەورۆز پڕە لە چەمک و مانا و میتۆلۆژیا و بابەتی کلتووریی جۆراوجۆر، بۆیە دەبێت زیاتر گرنگی پێبدرێت و نەوە لەدوای نەوە بە شکۆ و بایەخەوە یاد بکرێتەوە.

سەرباری بارودۆخی تەندروستی و ئابووری و ڕامیاری ناوچەکە، بەڵام گەلی کوردستان بە شکۆ و گەورەییەوە و بەپێی ڕێکارە تەندروستییەکان ئەم جەژنە پیرۆز دەکەن و بە شێوازی جیاجیا گوزارشت لە مانا قووڵ و جوانەکانی نەورۆز دەکەن.

جارێکیتر جەژنی نەورۆز و سەری ساڵی کوردی لە هەموو لایەک پیرۆز بێت .

وەزارەتی ڕۆشنیری و لاوان

2021/3/20