وەزیری ئەوقاف و کاروباری ئایینی لەگەڵ مامۆستایانی ئایینی پارێزگای دھۆک کۆبووەوە
![](/media/23076/img-20231023-wa0036.jpg?anchor=center&mode=crop&width=1200&height=630&rnd=133426006770000000)
ڕۆژی دووشەممە ٢٣ی تشرینی یەکەمی٢٠٢٣، د. پشتیوان سادق، وەزیری ئەوقاف وکاروباری ئایینی حکومەتی هەرێمی کوردستان، لەگەڵ مامۆستایانی ئایینی پارێزگای دھۆک کۆبووەوە.
لە دیدارەکەدا د.پشتیوان سادق، تیشکی خستەسەر دۆخی گشتی ناوچەکە و سوپاسی مامۆستایانی ئایینی کرد، کە بەوپەڕی بەرپرسیاریەتییەوە ئەرکەکانیان ڕادەپەڕێن و ڕۆڵی کارای مامۆستایانی بە گرنگ پێناسەکرد لەپەرەپێدانی ئاشتی کۆمەڵایەتی و گیانی پێکەوەییدا.
ھەرلەمیانی وتەکەیدا وەزیری ئەوقاف وکاروباری ئایینی ڕایگەیاند: ''نابێت رەفتاری نابەجێی لایەنێک لەسەر کۆی ئایینەکان ھەژمار بکرێت، پێویستە سەرجەم ئایینەکان پێکەوە بژین، ئەمە قەدەری خوای گەورەیە کە ژیان و بوونی ھەمووان لێرەیە، بۆیە ئەگەر ھەرلایەنێک پێی وابێت کە لایەنێکی تر لەناو دەبات، ئەمە کارێکی ناواقیعی و ناپەسەندە، میانڕەوی و دونیا بینی واقیعی مامۆستایانی ئایینی ئێمە جێگەی سوپاسە و ڕەنگدانەوەی جوانی لەنێو کۆمەڵگەداھەیە.''
لەبەشێکی تری وتەکەیدا د.پشتیوان سادق، تیشکی خستەسەر سەردانی شاندی ھەرێم بۆ بەغدا بۆ چارەسەری مافە یاسایەکانی خەڵکی کوردستان و رایگەیاند: '' مێژوو سەلماندویەتی کە کێشەی کورد چارەسەر نەکرێت ناوچەکە ئارام نابێت، ئایندەی کوردستان گەشە و ساڵی داھاتوو دۆخەکە باشتردەبێت.
کوردستان ھەموو ئیلتیزامێکی یاسایی جێبەجێکردووە لەسەر حکومەتی فیدراڵی پێویستە مافەکانی خەڵکی کوردستان بدات، بەڵام ئەمە مانایی ئەوە نییە کە ماف و ئیرادەی میللەتە سەربەزەکەمان بەھەر بەھانەیەک پێشێل بکرێت، چونکە خەبات و گیانفیدایی خەڵکی کوردستان رەتکردنەوەی پێشێلی مافە شەرعیەکان و زوڵمە لەسەر خەڵکی بەئیرادەو سەربەرزی کوردستان'' .