وەزارەتی دارایی و ئابووری وۆرکشۆپی بازاری کاغەزە داراییەکانی لە سلێمانی ئەنجام دا
ڕۆژی دووشەممە، ٢٥ ی ئابی ٢٠٢٥، وەزارەتی دارایی و ئابووری، وۆرکشۆپێکی لەسەر بابەتی (دامەزراندن یاخود کاراکردنی بازاڕی کاغەزە داراییەکان لە کوردستاندا) لە شاری سلێمانی ساز کرد؛ کە جێگری پارێزگار و پسپۆڕانی دارایی و ئابووریی زانکۆکانی سلێمانی، پۆلیتەکنیک، گەرمیان، چەرمۆ و ڕاپەڕین، سەرۆکی ناوەندی داراییی نێودەوڵەتی لە سلێمانی و بەڕێوەبەرە گشتییەکان، نوێنەری بانکەکان، شارەزایانی نێودەوڵەتی لە بواری بازاری کاغەزە داراییەکان بەشدار بوون.
وۆرکشۆپەکە لە لایەن یەکەی ئابووریی وەزارەتی دارایی و ئابوورییەوە ڕێکخرابوو؛ لە سەرەتادا وتاری ئاوات جەناب نووری، وەزیری دارایی و ئابووریی حکومەتی هەرێمی کوردستان، لەلایەن فەیسەڵ عەلی، ڕاوێژکاری ئابووریی وەزارەتەوە خوێندرایەوە. لە وتارەکەدا وەزیری دارایی و ئابووری، ئاماژەی بەوە کرد کە، "بازاڕێکی دارایی ڕێکخراو و کاریگەر و کارا، تەنها پاشەکەوت زیاد ناکات و وەبەرهێنان هاننادا، بەڵکو ئاستی شەفافیەت و لێپرسینەوە لە چالاکییە ئابوورییەکاندا بەرزدەکاتەوە و لەمەودای دووردا پشتبەستن بە کەرتی نەوت کەمتر دەکاتەوە، لە ڕێگای پەرەپێدانی کەرتە ئابووریەکانی ترەوە".
لەبەشێکی تری وتەکەیدا وەزیری دارایی و ئابووریی ڕایگەیاند: "ئەم بازاڕە هەنگاوێکی ستراتیژییە بۆ ئەوەی تەکامولی ئابووری هەرێمی کوردستان لەگەڵ ئابووری پارچەکانی تری عێراق و هەرێمی و نێودەوڵەتیی زیاد بکات".
دواتر لە لایەن چوار پسپۆڕی دارایی و ئابووری، لە پانێلێکدا بە روئیاییەکی ئەکادیمیانە، تیشکیان خستە سەر دەسپێشخەرییەکەی وەزارەتی دارایی ئابووری، لەسەر بابەتی (دامەزراندن یاخود کاراکردنی بازاڕی کاغەزە داراییەکان لە کوردستاندا)، پاشان لەلایەن بەشداربووانەوە گفتوگۆیەکی بەرهەمدار و پڕ لە پێشنیاری کردەیی و شیکاریی ئابووریانە، لەسەر بابەتی دروستکردنی بازاڕی کاغەزە داراییەکان لە کوردستاندا بەرێوە چوو.
