نوێنەرێ وەزیرێ خواندنا بلند و ڤەکولینێن زانستی پیروزباھیا دەرچووێن زانکۆیا نەورۆز کر
هەولێر، هەرێمى کوردستان، عێراق (GOV.KRD) - ب مەرەما پیروزباھیکرنا دەرچووێن زانکۆیا نەورۆز ، د. سەباح ئيبراهيم وەیس راوێژکارێ وەزیرێ خواندنا بلند ب نوینەرایەتیا د.ئارام محمد قادر وەزیرێ خواندنا بلند وڤەکولینێن زانستی ئامادەی رێورەسمێن ئاھەنگا دەرچوونا گەڕا ١٦ێ یا قوتابیێن زانکۆیا نەورۆز دا کر.
پشتی پیروزباھیا دەرچوویان و مالبات و خێزانێن وان کری، د. سەباح وەیس د پەیڤەکێ دا گوت : د دەمێ خواندنا هەوەدا هەرێما کوردستانێ د قوناغێن دژوار و بەرهنگاریێن مەزن دا دەرباز دبوو، قەیرانێن ئابوورى و سیاسی و پەتایا جیهانى یا کورونایێ ددەمەکیدا رویدان کو هوین د ناڤەراستا پروسسا خواندنێ دابوون ، جهێ شانازییێ یە کو هوین شیایین بسەر بلندی بسەرڤان هەمی رێگرییا بسەرکەڤن و قوناغەکا گرنگ یا ژیانا خو دەربازبکەن .
ھەروەسا ژبەر رولێ ئەوان یێ بەرچاڤ و گرنگ د پێگەهاندنا قوتابیاندا، نوینەرێ وەزیرێ خواندنا بلند و ڤەکۆلینێن زانستی دەستخوشی ل سەروک وراگر وھەمی ماموستا و فەرمانبەرێن زانکۆیا نەوروز ژی کڕ وگوت: زانکویا هەوە شیایە ژ روویێ کوالتییا خواندنێ وپێشڤەبرنا ئاستێ ئەکادیمى پێنگاڤێن گرنگ باڤێژیت ،ژبەر ڤێ چەندێ ئەم جاڤەریێنە ھەمی زانکویێت تایبەت ب ئاستەکێ زانستى یێ بلند و لدویڤ ستانداردێن ئەکادیمی خزمەتگوزاریا پێشکێش بکەن و ببنە نموونەیکا سەرکەفـتى یا وەبەرهێنانا کەرتێ تایبەت د بوارێ خواندنا بلند دا .
د. سەباح وەیس ئارمانجا جڤاتا وەزارەتێ ژی بۆ ئامادەبویێن رێورەسمێن ئەڤێ ئاھەنگێ دیار کڕ و گۆت : ئارمانجا مە ئەوە دەرفەتا خواندنێ بو گەنجێن وەلاتێ خۆ بەرفرەهتر لێبیکەین ، دا کو بشێن دناڤ وەلاتێ خودا هیڤی و ئومێدا بو دروست بکەین و خەونێن وان بجهـ بینین و هزر و شیانێت وان بێخینە د خزمەتا کوردستانێدا.
راوێژکارێ وەزیری رولێ کابینەیا نەھێ ژی ب گرنک دا زانین و ئەو چەندە ژی نە ڤە شارت کۆ ئەڤ بەرھەمە ب پێداگیریا کابینا نەهێ یا حکومەتا هەرێما کوردستانێ و جەنابێ سەروکێ وەزیران بویە و بەردەوام داکوکی لسەر هندێ کریە کو پێتڤی یە هەردەم ئەو راستیە لبیرا مەبیت کو پروسا خواندنێ دڤێت رەنگەڤەدانا پێـویستیا بازار و ڤەژاندنا ئابوورێ هەرێما کوردستانێ بیت، و پێتڤی یە بزاڤێن باشتر بدەین کو ناڤەروکا پروگرامێن خواندنێ و دەرئەنجامێن پروسا خواندنێ ب پێویستیا بازارێ کاری ڤە گرێدەین و باشتر دەرچوویا ئامادە بکەین ژ بو هندێ بشێین لسەر ئاستێ نافخویی و نیڤدەولەتى کێبرکیا ب دەستڤەئینانا دەرفەتێن کاری بکەن.
ژلایەکێ دیڤە نوینەرێ وەزیرێ خواندنا بلند رولێ وەزارەتێ ژی دڤی چارچوڤیدا دا زانین و ئاماژە ب ئەوێ چەندێ کڕ کۆ وەزارەتێ ب هاریکاریا هەفبەشێن نیڤ دەولەتى (بتایبەت بالیوزخانا ئەمریکا ل عێراقێ و رێکخراوا ئایرێکس یا ئەمریکى ) پروژەک ئامادەکرییە بناڤێ (بوردێ راویژکاری یێ ئەکادیمى و پیشەسازی ) (Industry Advisory Board)، ژئەرکێن ڤی بوردی گرێدانا زێدەتر یا ئەکادیمی و ناڤەروکا پروگرامێن خواندنێ و راهێنانێ و ڤەکولینێن زانستى يە ب پێویستیێن بازارێ کاری و کەرتێ پیشەسازی ڤە، هەروەسا ئەرکەکێ دیتر یێ ئەڤی بوردی بهێزکرنا زێدەتر یا کلتورێ هەماهەنگیێ دناڤبەرا سێکتەرێن جودا جودا ێن حکومەت و زانکو و کەرتێ گشتى و کەرتێ تایبەت و پیشەسازى دا ، و ئەنجامدانا بەردەوام یا روپێوا بو وان شیان و بەهرەیان ێن کو پێتڤی بو بازارێ کاری وڤەژاندنا ئابوورێ هەرێما کوردستانێ.
ل دویماھیێ د. سەباح وەیس ئاماژە ب گرنگیدان ب دەرئەنجام و پێشنیارێن ڤەکولینێن زانستى کڕ و دیار کڕ کۆ ئەڤ پشنیارە بنگەهەکە بو ئاڤاکرنا دەولەتا هەڤجەرخ ژهەمی رویەکى ڤە ،ژبەر ڤێ جەندێ وەزارەتا خواندنا بلند و ڤەکولیێن زانستى هەر ژ دەستپێکا ئەڤی سالێ (جڤاتا ڤەکولینێن زانستى)دروستکریە وبودجەیەک بکوژمێ (٥٠٠) ملیون دینارا وەک پێنگاڤەکا دەستپێکی بو ھاندانا رولێ ڤەکولەرا د زانکویاندا دابینکریە دا کو بشێن چارەسەرییا ئاریشێن ھەلاویستی بکەن برێکا بەرهەڤکرنا ڤەکولینێن جاواز، هەروەسا ئەڤ بودجەیە پاداشتێن ڤەکولەرا بخوڤەدگریت بو وان ڤەکولینین دهێنە بەلاڤکرن ل گوڤارێن زانستى یێن جیهانی و ێن باوەرپێکری د دەزگەهێن بەلاڤکرنێدا ئەوێن ئاستەکێ بلند هەی وەک (ثومسون رويتر و سكوباس) و دووبارە پیروزباھیا دەرچوویان کر و داخوازا سەرکەفتنێ بۆ خواست و سۆپاسیا پێشمەرگەھێن قارەمان کڕ ژبەر رولێ وان یێ بەرچاڤ د سەنگەرێن بەرەڤانیکرنێ دا.