دیدار و فێستيڤالا قوبه‌هان يا گه‌شت و گوزارى يا ئێكێ ل په‌يمانگه‌ها ئامێديێ هاته ئه‌نجامدان
هەولێر، هەرێمى کوردستان، عێراق (GOV.KRD) - ل ژێر دروشمێ به‌ره‌ف گه‌شت و گوزاره‌كا سه‌رده‌ميانه، روژا پێنج شه‌مبى رێكه‌فتى ٢٠٢٢/٦/٢ ل هولا په‌يمانگه‌ها ته‌كنيكى يا ئامێديێ، ب ئاماده‌بونا بریکارێ وەزارەت و هه‌ژماره‌كا زور ژ رێڤه‌به‌ر و سه‌روك زانكو و داموده‌زگه‌هێن حكومى و كه‌سايه‌تى و وه‌به‌رهێنه‌رێن بوارێ گه‌شت و گوزارێ، ديدار و فێستيڤالا قوبه‌هان يا گه‌شت و گوزارى يا ئێكێ، ژ لايێ زانكويا پوليته‌كنيكى يا دهوكێ و رێڤه‌به‌ريا گشتى يا گه‌شت و گوزارا دهوكێ ب هه‌ڤكارى دگه‌ل قايمقاميا ئامێديێ هاته سازكرن.
د يدارێ دا پشتى ده‌قا رێزگرتنێ ژ خوينا شه‌هيدان، په‌يڤا بخێرهاتنێ ژ لايێ د.هكار زكى راگرێ په‌يمانگه‌ها ته‌كنيكى يا ئامێديێ هاته پێشكێشكرن، پاشان په‌يڤا ديدار و فێستيڤالێ ژ لايێ د. ئارى عادل سه‌روكا زانكويا پوليته‌كنيكى يا دهوكێ ڤه هاته پێشكێشكرن، ل دويف بريارا زانكويێ برياره سالانه ئه‌ڤ ديداره ل ئامێديێ بهێته سازكرن.
ل دوڤدا دوو په‌نه‌ل د ديدارێ دا هاتنه پێشكێشكرن: د په‌نه‌لى دا به‌حس ل ديروكا گه‌شت و گوزارێ و ئه‌و به‌ربه‌ستێن دكه‌ڤنه د رێكا وه‌به‌رهێنه‌راندا ل بوارێ گه‌شت و گوزارێ و رولێ زانكويان د پێشخستن و گه‌شه‌پێدانا گه‌شت و گوزارێ دا هاتنه گه‌نگه‌شه‌كرن و به‌حسكرن.
د په‌نه‌لێ دوويێ دا: (د.محمد شكرى) سه‌روكێ ده‌سته‌يا گشتى يا وه‌به‌رهێنانێ و (د.جوتيار عادل) په‌يڤدارێ حكومه‌تا هه‌رێما كوردستانێ و (محمد محسن) سه‌روكێ جڤاتا پێشڤه‌برنا ئامێديێ به‌شدارى په‌نه‌لى بون و گه‌نگه‌شه ل سه‌ر چه‌ند ته‌وه‌رێن جودا جودا هاته كرن مينا هزرو ديدێن حكومه‌تێ بو وه‌به‌رهێنانێ د بوارێ گه‌شت و گوزارێ دا، هه‌روه‌سا رولێ راگه‌هاندنێ د وه‌رارا گه‌شت و گوزارێ دا، وه چ باشه بهێته كرن بو پتر پێشخستنا كه‌رتێ گه‌شت و گوزارى ل ده‌ڤه‌رێ.
پاشان خه‌لاتێ قوبه‌هان ب به‌شداربويێن په‌نه‌لان هاته به‌خشين.
ل دانێ ئێڤارى ژى فێستيڤالا قوبه‌هان يا گه‌شت و گوزارێ ژ لايێ به‌شداربوويێن ديدار و فێستيڤالا قوبه‌هان يا گه‌شت و گوزارى يا ئێكێ ل گوره‌پانا وه‌رزشى يا ئامێديێ هاته ڤه‌كرن و بو ده‌مێ دوو روژان دێ يا به‌رده‌وام بيت، كو تێدا پێشانگه‌هه‌كا وێنه‌يێن شينوارى و ديروكى و گه‌شت و گوزارى يێن ده‌ڤه‌را ئامێديێ هاتبوونه نيشاندان، هه‌روه‌سا هه‌ژماره‌كا چادران هاتبونه دانان و تێدا كه‌ل و په‌لێن شينوارى و جهێن گه‌شت و گوزارى و فلكلورى و خارنێن كوردى هاتبوونه نيشاندان.