٣هەزار ٤٥٣ قوتابی ل زانکۆیا پۆلیته‌کنیکی یا دهۆک ده‌رچوون
لژێر دروشمێ (دەرچویێن مە رێرەوێ تەکنولوجیا نوى کارو سەردەمن) ئاهەنگا گەرا یازدێ بۆ ٣٤٥٣ دەرچویێن سالا خواندنێ (٢٠٢٢- ٢٠٢٣) ل یاریگەها یانەیا دهۆک یا وەرزشى ب ئاماده‌بونا د. ئارام محەمەد وه‌زیرێ خۆاندنا بڵند و ڤه‌کۆلینێن زانستی و د.عەلی تەتەر پارێزگارێ دهۆکی و بریکارێ وەزارەت و ژماره‌کا رێڤەبەر و بەرپرسێن حکۆمی و حزبی و رێکخراوێن جڤاکێ مه‌ده‌نی و ماموستا و قوتابی و خێزانێن ده‌رچوویان هاته گێران
دبرگا ئێکێ یا ئاهه‌نگێ دا رێپیڤانا قوتابیان و خوێندکاران و وەرگرێن باوەرناما ماستەر و دکتورایێ و ماموستاێن زانکۆیێ ده‌سپێکڕ، و برگا دووێ دا پروفیسور دکتورە ئاری عادل سه‌رۆکا زانکۆیا پۆلیته‌کنیکی یا دهۆک بخێرهاتنا مێهڤانا و خێزانێن ده‌رچوویان کر و گوت : بخوشحالى ڤە د ئەڤ سالەدا ب پشتەڤانیا حکومەتا هەرێما کوردستانێ و هەول و ماندیبوونا وەزارەتا خواندنا بلند و ڤەکولینێن زانستى زانکۆیا مە شیایە ژمارەکا زور یا کورسیێن خواندنا بلند یا (دبلوما بالا، ماستەر و دکتورا)یێ ڤەکەت و ژمارەکا زور یا قوتابییان ل زانکۆیا مە هاتنە وەرگرتن، زێدەبارى وێ چەندێ کو د سالا بورى دا زانکویا مە کونفرانسێ (کارگێرى) یێ هەڤپشک دگەل زانکۆیا پۆلیتەکینک هەولێر و زانکۆیا UTHM یا مالیزى ئەنجام دایە و هەروەسا کونفرانسێ تەندروستى بهەڤکارى دگەل زانکۆیا فرات یا تەکنیکى یا ناڤەراست هاتە ئەنجامدان و دووەمین کونفرانسێ زانستى یێ پروژێن قوتابییان ژى ل زانکۆیا مە هاتە ئەنجامدان، هەروەسا ئامادەکارى دهێنەکرن بۆ ئەنجامدانا سێ کونفرانسێن زانستی یێ (ئەندازیارى) دگەل زانکۆیا بەرشەلونا و کونفرانسێ (پروگرامێن خواندنێ) ب هەڤکارى دگەل زانکۆیا میسل و وەزارەتا خواندنا بلند یا عیراقى و کونفرانسێ (تەندروستى) دگەل زانکۆیا فراتا ناڤەراست یا تەکنیکى،
ژلایێ خوڤە د. عەلى تەتەر پارێزگارێ دهوکێ دپەیڤکێ دا بناڤێ کارگێرى پارێزگەها دهۆکێ دەستخوشى و پیروزباهیا زانکۆیێ کر بۆ ئەوێ ژمارا دەرچوویان ئەوێن پێشکێشى جڤاکى کرین،
هەروەسا د. ئارام محەمەد وه‌زیرێ خۆاندنا بڵند و ڤه‌کۆلینێن زانستی دپەیڤەکێ دا گرنگیا هەبونا زانکۆیێن پۆلیتەکنیکى دپرکرنا بازارێ کارى دا دیارکر و گوت: نا بیت خواندنا پیشەى و تەکنیکى د ئەڤێ بەرتەنگیێ دا بمینیت، مە بزاڤێن کرین دگەل زانکویێن بیانى ئەڤێ بەرتەنگیێ بەرفرەهـ بکەین ژبو وێ چەندێ بشێین پێدڤێن بازارێ کارى پر بکەین.
دبەردەوامیا برگەیێن ئاهەنگێ دا سویندا ده‌رچوویان ژلایێ (پ. ھ. د. رەجەب ئیبراهیم) هاریکارێ سەرۆکا زانکۆیێ بۆ کاروبارێن قوتابیان ڤە هاته خواندن و قوتابیان دیفرا ڤەگێرا و ژلایێ خو ڤە (پ. ھ. د. سەلاح عەبدال) هاریکارێ سەرۆکا زانکۆیێ بۆ کاروبارێن کارگێرى و دارایى داخازا باوه‌رنامەیێن قوتابیان ژ سه‌رۆکا زانکۆیێ کرن و سەرۆکا زانکۆیێ ژی هەر ئێکى و ل دویف بسپوریا وی باوەرنامە پێ بەخشین.
