ب ئامادەبوونا وەزیرێ خواندنا بلندو ڤەكۆلینێن زانستی، زانکۆیا دهۆک پلانا ستراتیژی رادگەھینیت
ب ئامادەبوونا د.ئارام محەمەد، وەزیرێ خواندنا بلند و ڤەكۆلینێن زانستی و بریکارێ وەزارەت و د. داود ئەتروشى سەرۆکێ زانکۆێ و هژمارەکا راوێژکار و رێڤەبەرێن گشتى و بەرپرسێن سازیێن حكومی و ئەكادیمی و حزبی و ماموستایێن زانکۆیێ، ئەڤرۆ رۆژا چوار شەمبی رێكەڤتی پلانا ستراتیژی یا زانكۆیا دھۆك بۆ سالا ٢٠٢٣ هەتا ٢٠٣٨ ھاتە راگەھاندن.
دئەڤێ رێورەسمێ دا د.ئارام محەمەد، پشتەڤانیا وەزارەتا خواندنا بلند و ڤەکۆلینێن زانستی دیار کر و ئاماژە ب وێ چەندێ ژی کڕ کۆ زانکۆ جهێ درست و رەوایێ دانانا پلانایە و پلانێن موکم لسەر دەستێ ئەکادیمی و بسپور دهێنە دانان و ژلایەکێ دیڤە وەزیرێ خواندنا بلند رولێ زانکۆیا دهۆک د پێشڤەچون و گەشەکرنا بوارێ زانستی و ئەکادیمی ل دەڤەرا بادینان بلند نرخاند وهیڤی خواست کۆ زانکۆیێن هەرێما کوردستانێ زێدەتر رولێ خۆ دخزمەتکرنا جڤاکی دا ببینن.
وەزیرێ خواندنا بلند و ڤەكۆلینێن زانستی، ئاشکەرا ژی کر کۆ پلانا ستراتیژی، پلانەكا گشتگیر و بەرفەرهە، گەلەک پرۆژیان بخۆ ڤە دگرت کۆ هندەک ژ وان دسەرەكینە و هندەکێن دی دلاوەکینە، مینا "پرۆژێ گەشەپێدانا كەمپا كەسك و پیادە دۆست، پرۆژێ بجھئینانا پێڤاژۆیا بۆلۆنیا، پرۆژێ پێشڤەبرنا ژێرخانا دیجیتالی، پرۆژێ پێشڤەبرنا كارگێریا زانكۆیێ.
ل دویماهیێ وەزیرێ خواندنا بلند و ڤەكۆلینێن زانستی دەست خوشی ل سەرۆکێ زانکۆیا دهۆک و ستافێ زانکۆیێ کر و داخوازا سەرکەفتنێ و پێشڤەچونێ بۆ خواست.