وەزیرێ خواندنا بلند ئاڤاهیێ نوی یێ سەرۆکاتییا زانکۆیا دهۆک ڤەکر
وەزیرێ خواندنا بلند و ڤەکۆلینێن زانستی نێزیکی 100 ملیۆن دینار، ل ئاڤاهیێ نوی یێ سەرۆکاتییا زانکۆیا دهۆک خەرجکرینە و ب شێوازەکێ سەردەمیانە و ئالاڤ و کەرستێن مۆدێرن هاتییە ئاڤاکرن.
رۆژا دووشەمبێ، 23-06-2025، ب ئامادەبوونا د. ئارام محەممەد قادر، وەزیرێ خواندنا بلند و ڤەکۆلینێن زانستی؛ د. داوود سلێمان ئەترۆشی، سەرۆکێ زانکۆیا دهۆک؛ د. ئاری عادل، سەرۆکا زانکۆیا پۆلیتەکنیک – دهۆک؛ د. ئامانج عەبدوللا سەعید، شیرەتکارێ وەزیرێ خواندنا بلند؛ د. توانا نەجەف، رێڤەبەرێ گشتی یێ فەرمانگەها کارگێری و دارایی ل وەزارەتا خواندنا بلند؛ ژمارەیەکا رێڤەبەر و بەرپرسێن دامودەزگەهێن حکومی؛ ئەندامێن جڤاتا زانکۆیا دهۆک و مامۆستا و فەرمانبەرێن سەرۆکاتییا زانکۆیێ، ئاڤاهیێ نوی یێ سەرۆکاتییا زانکۆیا دهۆک هاتە ڤەکرن.
ل دور ئەڤێ چەندێ، د. ئارام محەممەد قادر، وەزیرێ خواندنا بلند و ڤەکۆلینێن زانستی، گوت: "زانکۆیا دهۆک خزمەتەکا مەزن کریە و شانازییە بشێین پشتەڤانییێ لێ بکەین". هەڤدەم وەزیرێ خواندنا بلند خۆشحالییا خۆ ب ئەڤێ سەرەدانێ دەربری وڤەکرنا ئاڤاهیێ نوی یێ سەرۆکاتییا زانکۆیا دهۆکێ و کار و پێنگاڤێن وێ ل سەر ئاستێ کوردستانێ و ناڤدەولەتی، بلند نرخاندن.
ژلایێ خۆڤە د. داود سلێمان ئەترۆشی، سەرۆکێ زانکۆیا دهۆک بخێرهاتنا ئامادەبوویان کر و سوپاسیا وەزیرێ خواندنا بلند و ڤەکۆلینێن زانستی کر، بۆ پشتەڤانییا وان یا بەردەوام ژ بۆ زانکۆیا دهۆک و ب تایبەتی، دروستکرنا ئاڤاهیێ نوی یێ سەرۆکاتییا زانکۆیێ.
پشتی ڤەکرنا ئاڤاهیێ نوی، شاندێ وەزارەتا خواندنا بلند و ستافێ زانکۆیا دهۆک گەریانەک دناڤ ئاڤاهی و باغچێ رووەکی یێ زانکۆیا دهۆکدا کر و وەزیرێ خواندنا بلند خۆشحالی و سەرسۆرمانا خۆ ب ڤی پرۆژێ جۆری دەربری و دارەکا کەڤۆتێ ل ناڤ باغچێ رووەکیێ زانکۆیێدا چاند. پاشی بەر ب سەنتەرێ رەوشەنبیری و جڤاکی یێ زانکۆیێ ب رێکەڤتن و ل وێرێ وەزیرێ خواندنا بلند و ڤەکۆلینێن زانستی لگەل ئەندامێن جڤاتا زانکۆیا دهۆک کۆمبوو و دانوستاندنێن تێروتەسەل ل دۆر مژارێن جودا لگەل ئەندامێن جڤاتا زانکۆیێ ئەنجامدان.
دهێتە زانین کۆ ئاڤاهیێ نوی یێ سەرۆکاتییا زانکۆیا دهۆک ب شێوازەکێ سەردەمییانە و ئالاڤ و کەرستێن مۆدێرن، ب پشتەڤانییا وەزیرێ خواندنا بلند و ڤەکۆلینێن زانستی هاتییە ئاڤاکرن، ژ سێ قاتا پێکدهێت و 30 ژۆر و هۆلا بخۆڤەدگریت. پشتی ڤەکرنا ڤی ئاڤاهی و ژبەرکو دکەڤیتە ل ناڤ کەمپا سەرەکییا زانکۆیێ، دێ بیتە کارئاسانی بۆ مامۆستا، فەرمانبەر و قوتابیێن زانکۆیا دهۆک.
