وەزیری شارەوانی و گەشتوگوزار سەردانی گردجووتیار و ڕێڕەوە سرووشتییەكانی ئاوەڕۆ دەكات
![](/media/9171/267936569_3110435109224842_519054248062954703_n.jpg?anchor=center&mode=crop&width=1200&height=630&rnd=132843767390000000)
هەولێر، هەرێمی کوردستان، عێراق (GOV.KRD)- ڕۆژی شەممە 18/12/2021 ساسان عەونی وەزیری شارەوانی و گەشتوگوزار، بە مەبەستی لە نزیكەوە ئاگاداربوون لە چۆنیەتی بەڕێوەچوونی پرۆسەی خاوێنكردنەوەی پاشماوەكانی لافاو و بەسەركردنەوەی ئەو ڕێڕەوە سرووشتییانەی ئاوەڕۆی سنوورەكە، سەردانی گەڕەكی گردجووتیاری شاری هەولێری كرد و بەدواداچوونی بۆ پرۆسەكانی خاوێنكردنەوە و چۆنیەتی كارەكانی فراوانكردنی ڕێڕەوە سرووشتییەكانی ئاوەڕۆکان كرد.
وەزیری شارەوانی و گەشتوگوزار وێڕای گفتوگۆكردن لەگەڵ ئەو هاووڵاتییانەی كە ماڵەكانیان دووچاری زەرەر و زیان بوونەتەوە، هاوكات بە مەبەستی ڕێگریكردن لە ئەگەری لافاو، ڕێڕەوە سرووشتییەكانی ئاوەڕۆی سنوورەكەی بەسەركردەوە، کە تیمەکانی سەرۆکایەتی شارەوانیی ھەولێر بە ھاوبەشیی لەگەڵ بەڕێوەبەرایەتیی ئاودێریی ھەولێر کاری پاککردنەوە و فراوانکردنیان بۆ دەکرێت.
شایەنی باسە، ئەندازیار عەبدولواحید سەرۆكی شارەوانیی هەولێر ڕاستەوخۆ سەرپەرشتیی پرۆسەی خاوێنكردنەوەی گردجووتیار دەكات، لە میانەی سەردانەكەدا بەدواداچوون بۆ هۆكارەكانی دروستبوونی لافاو و چۆنیەتی ڕێگریكردن لە دووبارەبوونەی كرا، كە بەشێكی ڕێڕەوە سرووشتییەكانی ئاوەڕۆی سنوورەكە پێشتر زێدەڕۆییان كراوەتەسەر و ئەمەش بووەتە هۆی ئەوەی ڕێڕەوەكان تەسك ببنەوە و نەتوانن بەرگەی ئەو ڕێژە زۆرەی ئاوی قورس و لافاو بگرن، بەڵام ئێستا تیمەكانی شارەوانی بە وردی سەرقاڵی ئەوەن ڕێگری لە هەر ئەگەرێكی دیكەی لافاو لە سنوورەكەدا بكهن.