هەولێر، هەرێمی کوردستان، عێراق (GOV.KRD)- ژمارەیەك پڕۆژەی خزمەتگوزاری لە سێكتەری شارەوانی و ئاو و ئاوەڕۆ لە شاری هەولێر و دەوروبەری جێبەجێ دەكرێن و وەزارەتی شارەوانی و گەشتوگوزاریش بڕی زیاتر لە 833 ملیۆن دیناری بۆ پڕۆژەكانی هەردوو سێكتەری شارەوانی و ئاو و ئاوەڕۆ خەرج كرد.

لەسەر ڕێژەی 15%ی داهاتی شارەوانی و ڕێژەی 100%ی داهاتی فرۆشتنی زەوی ڕوكنی شارەوانی لە سنووری سەرۆكایەتیی شارەوانیی هەولێر، لەگەڵ ڕێژەی 17%ی داهاتی بەڕێوەبەرایەتیی ئاو و ئاوەڕۆی هەولێر گوژمەی زیاتر لە 833 ملیۆن دینار بۆ ژمارەیەك پڕۆژە لە شاری هەولێر و دەوروبەری تەرخان كرا.

پڕۆژەكان لە هەردوو سێكتەری شارەوانی و ئاو و ئاوەڕۆ بریتین له‌ جێبەجێكردنی پڕۆژەی چاككردنەوەی (یاریی منداڵان و تارتان) ی گشت پاركەكانی هەولێر لەگەڵ نۆژەنكردنەوەی پاركی شانەدەری 1و2و3 لە هەولێر. هەروەها كڕینی سۆندە و تانكی گازوایل بۆ مۆلیدەی سەر بیرەكانی ناو شاری هەولێر و دەوروبەری، خاوێنكردنەوەی خەزانی پەمپ ستیشنەكانی تونێل و ژێر پردەكانی شاری هەولێر و درێژكردنەوەی تۆڕی ئاو لە گوندی قۆڕیتان و دانانی ئامێری كلۆر لە جۆری تیوب و كڕینی قاعیدە و تەبلەی دایفرام، كە ئەو گوژمەیە بە گوێرەی یاسا و ڕێنماییەكانی دارایی خەرج دەكرێت.