لە شاری كەلار بە گوژمەی ٨١٣ ملیۆن دینار شەقامێكی جووتساید دروست دەكرێت
![](/media/17944/whatsapp_image_2023-01-19_at_135424.jpg?anchor=center&mode=crop&width=1200&height=630&rnd=133190284550000000)
هەولێر، هەرێمى کوردستان (GOV.KRD)- وەزارەتی شارەوانی و گەشتوگوزار لە چوارچێوەی كارنامەی كابینەی نۆیەمی حكومەتی هەرێمی كوردستان، بایەخێكی زۆر بە پەرەپێدانی پرۆژەی دروستكردن و نۆژەنكردنەوەی شەقامی ناوخۆیی و سەرەكی لە شار و شارۆچكەكان دەدات و لەم چوارچێوەیەشدا پڕۆژەی دروستكردنی شەقامێكی جووتساید لە شاری كەلار ئێستا لە قۆناغی جێبەجێكردندایە.
گوژمەی ئەو پڕۆژەیە بریتییە لە ٨١٣ ملیۆن دینار و لەسەر بودجەی پەرەپێدانی پارێزگاکانە و لەلایەن سەرۆکایەتیی شارەوانیی کەلار سەرپەرشتیی جێبەجێكردنی دەكرێت.
ئەو پڕۆژەیە شەقامێکی ٣٠ مەتریی جووتساید بە درێژایی هەزار و هەشتا مەتر لە خۆی دەگرێت و دروستکردنی شۆستە و ئاوەڕۆ و باراناو و چەند تایبەتمەندییەكی دیكەشی لەگەڵدایە. بە تەواوبوونی پڕۆژەكە، دانیشتوانی هەر چوار گەڕەکی ئەندازیاران و ڕزگاری و ئەنفال و گەرمیان لە شاری كەلار سوودمەند دەبن.