تاریفەی ئاو به‌ مه‌به‌ستی به‌رزكردنه‌وه‌ی ئاستی خزمه‌تگوزارییه‌كانی ئاو داده‌ڕێژرێته‌وه‌

بە مەبەستی دووبارە داڕشتنەوەی تاریفەی ئاو لە هەرێمی کوردستان و گونجاندنی لەگەڵ گۆڕانکارییە بەردەوامەکان و بەرزکردنەوەی ئاستی خزمەتگوزارییه‌كان بۆ هاووڵاتییان، بەڕێوەبەرایەتیی گشتیی ئاو و ئاوەڕۆی وه‌زاره‌تی شاره‌وانی و گه‌شتوگوزار، بە هەماهەنگیی لەگەڵ ڕێکخراوی VNGی هۆڵەندی، وۆرکشۆپێکی لە شاری هەولێر ڕێك خست.

وۆرکشۆپەکە بە سەرپەرشتیی بەڕێوەبەرایه‌تیی گشتیی ئاو و ئاوەڕۆ و بە به‌شداریی سەرجەم بەڕێوەبەرایەتییەکانی ئاو و ئاوەڕۆی سه‌ر به‌ به‌ڕێوه‌به‌رایه‌تیی گشتیی ئاو و ئاوه‌ڕۆ به‌ڕێوه‌ چوو؛ ئەندازیاران و فەرمانبەرانی پەیوەندیدار بە بابەتەکانی تاریفەی ئاو و هاوبەشان و داهات، لە سەرجەم پارێزگه‌کانی هەرێمی کوردستان و ئەندازیارانی بەڕێوەبەرایەتیی گشتیی ئاو و ئاوەڕۆ و نوێنەری ڕێکخراوی یونیسێف و نوێنەری کۆمپانیاکانی کۆکردنەوەی داهات به‌شدار بوون.

‌له‌ وۆركشۆپه‌کەدا تاوتوێی چەندین پێشنیار و دیراسە و پلانی تایبەت بە هەنگاوەکانی داهاتوو، له‌ سێكته‌ری ئاودا کرا. بە تەواوبوونی پرۆژەکەش گۆڕانکاری لە شێوازی تاریفە و هاوبەشی ئاودا دەکرێت؛ بە جۆرێک لەگەڵ ڕەوشی ئابووریی هاووڵاتییان زیاتر بگونجێت و ئاستی خزمەتگوزارییه‌كان بۆ هاوبەشانی ئاو بەرزتر دەبێتەوە و پەرەی زیاتر بە خزمەتگوزارییه‌كانی ئاو بۆ هاوبه‌شان ده‌درێت.