گوژمه‌ی پێویست بۆ سێ پرۆژه‌ی خزمه‌تگوزاری له سلێمانی خه‌رج ده‌كرێت
وه‌زاره‌تی شاره‌وانی و گه‌شتوگوزار له چه‌ند فه‌رمانێكی وه‌زاری، ڕه‌زامه‌ندی له‌سه‌ر خه‌رجكردنی سێ گوژمه دا؛ به‌مه‌به‌ستی جێبه‌جێكردنی سێ پرۆژه‌ی خزمه‌تگوزاری له بواری ئاو و شاره‌وانیدا، له سنووری سه‌رۆكایه‌تیی شاره‌وانیی سلێمانی.
گوژمه‌كان له‌سه‌ر ڕێژه‌كانی١٠٠%ی داهاتی سه‌رۆكایه‌تیی شاره‌وانیی سلێمانی، ١٧%ی داهاتی به‌ڕێوه‌به‌رایه‌تیی ئاوی سلێمانییه، به‌پێی یاسا و ڕێنماییه‌كانی دارایی تایبه‌ت به داهات، له‌لایه‌ن وه‌زاره‌تی شاره‌وانی و گه‌شتوگوزاره‌وه ڕه‌زامه‌ندی خه‌رجكردنیان دراوه.
پڕۆژه‌كانیش بریتین له: ڕاكێشانی تۆڕی ئاو بۆ جیاكراوه‌كانی ٥٩ -٦٠ی كه‌رتی٢ی قڕگه، ڕاكێشانی بۆریی ئاو له گه‌ڕه‌كی ڕاپه‌ڕین، جێبه‌جێكردنی پرۆژه‌ی كاری كۆنكرێتكردن و ڕاكێشانی كربستۆن بۆ تۆڕی شه‌قامی جیاكراوه‌ی نۆكانی ١٤٠ی قڕگه‌ی به‌رده‌م وێستگه‌ی ئاوی قڕگه له گه‌ڕه‌كی ماردین.
ئه‌مه‌ش له‌كاتێكدا له هه‌فته‌كانی ڕابردوو وه‌زاره‌تی شاره‌وانی و گه‌شتوگوزار، به‌هه‌مان شێوه ڕه‌زامه‌ندیی له‌سه‌ر خه‌رجكردنی ژماره‌یه‌ك گوژمه‌ی دیكه دا؛ بۆ جێبه‌جێكردنی چه‌ند پرۆژه‌یه‌كی تری خزمه‌تگوزاری له سنووری شاری سلێمانی.