سەرۆکی حکومەت ڕەزامەندیی لەسەر خەرجکردنی گوژمەی 195 ملیار دینار بۆ دروستکردنی گەورەپڕۆژەی ئاوی خەبات نیشاندا
ڕۆژی یەکشەممە، ٢٨ی ئەیلوولی ٢٠٢٥، مەسرور بارزانی، سەرۆكی حكومەتی هەرێمی كوردستان، بەمەبەستی چارەسەریی ڕیشەیی و درێژمەودای گرفتی كەمئاوی لە سنووری قەزای خەبات، بڕیاریدا بە دروستكردنی گەورەپڕۆژەی ئاوی خەبات و ڕەزامەندیی نیشاندا لەسەر خەرجکردنی گوژمەی ١٩٥ ملیار دینار، لەسەر بودجەی وەبەرهێنانی وەزارەتی شارەوانی و گەشتوگوزار بۆ جێبەجێکردنی پڕۆژەکە.
بەمەبەستی چارەسەركردنی بنەڕەتییانەی گرفتی كەمئاوی لە سنووری قەزای خەبات، پێشتر لە ٢٠٢٥/٦/١٦، وەزارەتی شارەوانی و گەشتوگوزار بۆ ئەم مەبەستە، نووسراوی بۆ ئەنجومەنی وەزیرانی هەرێمی كوردستان بەرز كردەوە و مەسرور بارزانی، سەرۆكی حكومەتی هەرێمی كوردستان، بڕیاریدا بە دروستكردنی پڕۆژەی ئاوی قەزای خەبات، كە یەكێكە لە گەورەپڕۆژە نوێكانی ئاوی خواردنەوە لە هەولێر و بەمزووانە دەكەوێتە بواری جێبەجێكردنەوەوە.
پڕۆژەی ئاوی خەبات، پڕۆژەیەكی گەورە و ستراتیژیی حكومەتی هەرێمی كوردستانە، لە ڕۆژێكدا توانای بەرهەمهێنانی (١٢٠ هەزار) مەتر سێجا ئاوی خواردنەوەی هەیە؛ زیاتر لە ٤٠٠ هەزار كەس لە سنووری قەزای خەبات، ناحیەكانی ڕزگاری، تۆبزاوە، كەورگۆسك و ٤٠ گوندی سنوورەكەش تا ساڵی ٢٠٥٠ لێی سوودمەند دەبن.
وێڕای ژمارەیەك خەزان و پێگەی سەرەكیی پڕۆژەكە، درێژی بۆرییەكانی نزیكەی ٣٠٠ كیلۆمەترە و پێنج كیلۆمەتریش كارەبای لەگەڵدایە. دوای ڕەزامەندیی مەسرور بارزانی و ڕەزامەندی لەسەر خەرجکردنی گوژمەکەی، ئێستا كار لەسەر قۆناغەكانی پڕۆسەی تەندەرینگ دەكرێت و بەمزووانە ئەم گەورەپڕۆژەیەش لە هەولێر دەكەوێتە قۆناغی جێبەجێكردنەوە.