وەزیری بازرگانیی عێراق لە هەرێمی کوردستانە

ڕۆژی پێنجشەممە ٢٢ی شوباتی ٢٠٢٤، ئەسیر داود، وەزیری بازرگانیی عێراق لە سەردانێکی فەرمی بۆ هەرێمی کوردستان، بە یاوەری کەمال موسلیم، وەزیری بازرگانی و پیشەسازیی حکومەتی هەرێمی کوردستان، سەردانی بەڕێوەبەرایەتییەکانی کۆمەڵگەی بازرگانییان لە پارێزگای سلێمانی کرد.
بە ئامادەبوونی بەڕێوەبەرانی گشتیی بازرگانیی هەرێم و گەشەپێدانی پیشەسازی، لەگەڵ بەڕێوەبەری فەرمانگەکانی چاودێریی بازرگانی و بازرگانیی خۆراک و پسولەی خۆراک و تۆمارکردنی کۆمپانیاکان و بازرگانیی دانەوێڵە و دروستکراوی دانەوێڵە، کۆبوونەوە و بەوردی گرفتەکانی بەڕێوەبەرایەتییەکان، کێشەی کۆگاکان و سەبەتەی خۆراک و بەشەئاردی هاووڵاتییان و پسولەی خۆراک و ئەو بابەتانەی بە وەزارەتەوە پەیوەستن، باسیان لێوە کرا و میکانزمی چارەسەرکردنیان بۆ دانرا. دواتر لە کۆنگرەیەکی ڕۆژنامەوانیدا لەگەڵ میدیاکان ئامانج و مەبەستی سەردان و کۆبوونەکان خرانە ڕوو، و وەڵامی پرسیاری میدیاکارەکان درایەوە.
جێی ئاماژەیە ئەم سەردانەی وەزیری بازرگانیی عێراق بۆ لەنزیکەوە ئاگاداربوونە لە ئیشوکارەکانی ئەو بەڕێوەبەرایەتییانەی کارەکانیان لەگەڵ حکومەتی فیدڕاڵ بە هەماهەنگی بەڕێ دەکەن.