وەزیری بازرگانی و پیشەسازی پێشوازی لە باڵيۆزى دەوڵەتی کوێت کرد
ڕۆژی یەکشەممە، ٢٤ی ئابی ٢٠٢٥، کەمال موسلیم، وەزیری بازرگانی و پیشەسازی، پێشوازی لە حوسێن محەممەد، باڵيۆزى دەوڵەتی کوێت کرد.
لە دیدارەکەدا کە هەر یەکە لە بەڕێوەبەرانی گشتیی دیوان و تۆمارکردنی کۆمپانیاکان ئامادەی بوون، باس لە ئاستی پەیوەندیی بازرگانیی نێوان هەرێمی کوردستان و دەوڵەتی کوێت کرا و پێشنیاری پێویست بۆ پێشخستنی پەیوەندییەکان خرانە ڕوو.
وەزیری بازرگانی و پیشەسازی و تیمی ئامادەبووی وەزارەت، تیشکیان خستە سەر ئەو یاسا و ڕێنماییانەی حکومەت و وەزارەت، کە بەرکارن و کاراسانيی تەواو بۆ خاوەنکار و کۆمپانیا و سەرمایەدارانی بیانی دەکەن؛ بۆ ئەوەی لە هەرێمی کوردستان سەرمایەگوزاری بکەن و ڕۆڵیان لە پێشخستنی ئاستی بازرگانی و وەبەرهێنان و پیشەسازیی کوردستان هەبێت.
لای خۆیەوە باڵيۆزى کوێت، بەگرنگییەوە باسی لە تێڕوانینی دەوڵەتەکەی بۆ کارکردن لە هەرێمی کوردستان و پێشخستنی ئاستی بازرگانیی کۆمپانیا کوێتییەکان کرد؛ ڕۆڵی هاوکاری و کاراسانیی حکومەت و وەزارەتی بازرگانی بەرز نرخاند و جەختی کردەوە کە لێبڕاوانه کار دەکەن بۆ ئەوەی لەیەکزیکبوونەوە دروست ببێت و بازرگانانی کوێت و هەرێمی کوردستان کاری پێکەوەییان هەبێت.
جێی ئاماژەیە لە چوارچێوەی کارنامەی حکومەتی هەرێمی کوردستان و یاسا و ڕێنماییە بەرکارەکانی وەزارەتی بازرگانی و پیشەسازی، کاراسانیی تەواو بۆ هێنانی سەرمایەگوزاری بیانی کراوە؛ لەپێناو بەرزکردنەوەی ئاستی ئابووری و پیشەسازی و وەبەرهێنان لە هەرێمی کوردستاندا.
