کار بۆ پەرەپێدانی پەیوەندیی بازرگانیی نێوان هەرێمی کوردستان و ئیمارات دەکرێت
ڕۆژی یەکشەممە، ٢٤ی ئابی ٢٠٢٥، کەمال موسلیم، وەزیری بازرگانی و پیشەسازی، پێشوازی لە شەیخە فەرحان، هەڵسوڕێنەری کاروباری کونسوڵخانەی میرنشینی ئیماراتی عەرەبی کرد و گفتوگۆیان لەبارەی ڕەوشی ئابووری و بازرگانی لە هەرێمی کوردستان کرد.
لەدیدارێکدا کە هەریەکە لە دلێر مەلاحەسەن، بەرپرسی کاروباری وڵاتانی عەرەبی لە فەرمانگەی پەیوەندییەکانی دەرەوە، بەڕێوەبەرانی گشتیی دیوان و تۆمارکردنی کۆمپانیاکانی وەزارەت ئامادەبوون، تیشک خرایە سەر ئاستی ئاڵوگۆڕی بازرگانیی هەردوولا و باس لە ژمارەی کۆمپانیا تۆمارکراوە ئیماراتییەکان لەهەرێم کرا کە زۆرباشە و هەوڵدەدرێت باشتر بکرێت.
لای خۆیەوە وەزیری بازرگانی و پیشەسازی، ئاماژەی بەوەکرد کە پەیوەندییەکان لە بوارەکانی بازرگانی و پیشەسازی و وەبەرهێنان تاچەند بەهێزبن، کاریگەریی باش و ئەرێنییان لەسەر دۆخی ئابووری هەرێم دەبێت و گوتی: "حکومەتی هەرێمی کوردستان و وەزارەتی بازرگانی و پیشەسازی، هەموو ئاسانکارییەک لە چوارچێوەی یاسا و ڕێنمایی بەرکاردا، بۆ هاوکاریکارکردنی بازرگانان و کۆمپانیا بیانییەکان دەکەن".
هەر لە دانیشتنەکەدا ڕوونکردنەوەی پێویست لەبارەی یاساکان و پلانی ساڵانەی وەزارەت درا و پێشنیاری چەند هەنگاوێک بۆ پێشخستنی پەیوەندییەکان کرا.
