ڕێکخەری ڕاسپاردە نێودەوڵەتییەکان لەگەڵ بریکاری وەزارەتی دەرەوەی حکومەتی فيدراڵ كۆبووهوه
![](/media/26567/whatsapp-image-2024-05-13-at-115844_eecd4382.jpg?anchor=center&mode=crop&width=1200&height=630&rnd=133600649080000000)
ڕۆژى دووشەممە ١٣ی ئایاری ٢٠٢٤، لە شاری بەغدا، د. دیندار زێباری، ڕێکخەری ڕاسپاردە نێودەوڵەتییەکان لە حکومەتی هەرێمى كوردستان، لەگەڵ عومەر بەرزنجی، بریکاری وەزارەتی دەرەوەی حکومەتی فيدراڵ بۆ کاروباری یاسایی و فرەلایەن کۆبووهوە.
مەبەست لە کۆبوونەوەکە ئاڵوگۆڕی زانیاری، بیروڕا و نزیککردنەوەی هەڵوێستەکان و ڕاوێژکردن لە تەوەرە پەیوەندیدارەکان و گرنگيی بەشداريكردنى کارای نووسینگەی ڕێکخەری ڕاسپاردە نێودەوڵەتییەکان لەو کۆبوونەوانەی کە لە بواری مافی مرۆڤ، پەیماننامە و ڕێککهوتننامە نێودەوڵەتییەکان و خستنەڕووی دیدگای حکومەتی هەرێم بوو، لە کۆنفرانس و کۆنگرە نێودەوڵەتییە پەیوەندیدارەکان.
لە دیدارەکەدا جەخت لە دانانی میکانیزمێکی هەماهەنگيی هاوبەش کرایەوە، بۆ ئەوەی کە دۆسییە پەیوەندیدارەکان ئاڵوگۆڕی زیاتریان پێ بکرێت و هەرێم ڕۆڵی کارا ببینێت لە چوارچێوەی کۆماری عێراق لە جێبەجێکردنی ئیلتیزاماتەکان لەسەر ئاستی نێودەوڵەتی، بە تایبەتی لەڕووی یەکخستنی هەڵوێستەکان و بەشداريی کاریگەر، لە چوارچێوەی میکانیزمەکانی سیاسەتی دەرەوەی عێراق.