بە گوژمەی ١٨ ملیار دینار جووتسایدی ئیبراهیم خەلیل- باچیکا لە زاخۆ جێبەجێ دەکرێت
لە كابینەی نۆیەمدا، لەژێر چاودێریی مەسرور بارزانی، سەرۆكی حكومەتی هەرێمی كوردستان، ژمارەیەك پڕۆژە لە سنووری ئیدارەی سەربەخۆی زاخۆ جێبەجێ كراون. یەكێك لەوانە چاككردنی جووتسایدی ئیبراهیم خەلیل – باچیكا و دابینکردنی ئاوەڕۆ و ئاوڕێژ و کارەبای پڕۆژەکەیە.
یوسف بەهجەت، بەڕێوەبەری پڕۆژەکە، بۆ پێگەی فەرمیی حكومەت وردەكاریی زیاتر لەسەر ئەم بابەتە دەخاتە ڕوو و دەڵێت: "ئەم پڕۆژەیە بە گوژمەی زیاتر لە ١٨ ملیار و ٢٧١ ملیۆن و ٦٦١ هەزار دینار جێبەجێ دەكرێت، تەواوکەری شەقامی سەرەكیی دێرەبوون – ئیبراهیم خەلیل و ئیبراهیم خەلیل- زاخۆیە؛ بە شەقامێكی نێودەوڵەتی هەژمار دەكرێت و دەبێتە ڕێگەی بازرگانیی نێوان هەرێم و عێراق."
گوتیشی: "ڕووبەری پڕۆژەکە ١٠٠ هەزار م٢ و درێژیی پڕۆژەكە ٣.٦٥ کیلۆمەتر و پانیی پڕۆژەكە ٣٣ مەترە؛ ئەم شەقامە ئێستا تاکئاراستەیە، بەڵام دواتر دەبێتە جووتئاراستە و هەر ئاراستەیەک ٣ ڕێڕەوە و ٣.٧٥ مەتر پانە. پڕۆژەکە دەبێتە هۆی کارئاسانیی ژیانی هاووڵاتییان و بەهێزکردنی جووڵەی بازرگانی و کەمکردنەوەی ئەگەری ڕووداوی لافاو لە ناوچەکەدا".
فەرمانگەی میدیا و زانیاری
٢ی ئاداری ٢٠٢٣